Kocha Mkuu wa Yanga Cedric Kaze ameeleza kuvutiwa na kiwango kilichoonyeshwa na mlinda lango Farouk Shikhalo katika mchezo wa ligi kuu dhidi ya Mtibwa Sugar, mchezo ambao Yanga ilifanikiwa kuondoka na ushindi wa bao 1-0
Huo ulikuwa mchezo wa pili Shikhalo anacheza kwenye ligi msimu huu akichukua nafasi ya Metacha Mnata ambaye jana alipumzishwa
Kaze amesema katika duru ya pili Shikhalo atapewa nafasi zaidi ya kucheza kama ilivyokuwa kwa Metacha ambaye amecheza jumla ya michezo 19
"Metacha hana tatizo lolote, tuliamua kumpumzisha kwani ametumika kwa mechi nyingi. Shikhalo amefanya vizuri pia nafikiri tutampa mechi zaidi katika duru hii pamoja na kumtumia kwenye michuano ya kombe la FA," alisema Kaze
Mlinda lango huyo kutoka nchini Kenya alirejesha imani ya mabosi wake kwake kwenye michuano ya kombe la Mapinduzi iliyofanyika mwezi uliopita visiwani Zanzibar
Katika michuano hiyo, Shikhalo aliibuka kuwa mlinda lango bora wa mashindano, akiisaidia Yanga kushinda mechi za nusu fainali dhidi ya Azam Fc na fainali dhidi ya Simba kupitia mikwaju ya penati
