Mshauri wa Yanga Senzo Mazingisa amesema changamoto zinazokabili vilabu vingi vya soka Barani Afrika zinatokana na kutokuwa na mifumo sahihi ya uendeshaji
Senzo anayesimamia mchakato wa Mabadiliko ya mfumo wa uendeshaji Yanga akiwa mshauri mkuu, amesema Mabadiliko yanayofanywa na Yanga yataongeza uwajibikaji wa viongozi katika masuala mbalimbali na yatakuwa mfano kwa wengine kujifunza
Wiki iliyopita FIFA iliiamuru Yanga kumlipa aliyekuwa mshambuliaji wake Amisi Tambwe malimbikizo ya madeni anayoidai klabu hiyo
Aidha FIFA ilitahadharisha kuwa Yanga itafungiwa kutosajili wachezaji kwa madirisha matatu kama hawatamlipa Tambwe katika kipindi cha siku 45
Jambo hili halikuwafurahisha mashabiki na wanachama wa Yanga kwani wanaamini upo uzembe uliofanyika hadi kupelekea Tambwe akalipeleka suala hilo FIFA
Senzo amesema kesi hii ni mfano wa umuhimu wa kuwa na mfumo bora wa uendeshaji ambao utaepusha changamoto za aina hii
"Utaona sababu kubwa ya klabu na GSM kusimamia mchakato huu wa Mabadiliko ni kutaka kuona klabu inaondoka katika eneo kama hili. Hili suala la Tambwe tunalishughulikia lakini hatutarajii kuona jambo kama hili linajitokeza tena," alisema
