Aliyekuwa Kocha Msaidizi wa Yanga Juma Mwambusi amewataka wanaopotosha kuhusu kuondoka kwake Yanga waache kwani hawamtendei haki
Mwambusi aliuomba uongozi wa Yanga aachie nafasi yake ili aendelee na matibabu ya changamoto za kiafya zinazomkabili
Wiki iliyopita uongozi wa Yanga uliridhia ombi hilo na hivyo kufanya mchakato wa kutafuta kocha msaidizi mwingine
Ni jana tu Nizar Khalfan ametangazwa kuchukua nafasi hiyo iliyoachwa na Mwambusi
Hata hivyo katika mitandao ya kijamii wamejitokeza watu wasio waungwana ambao wanasambaza taarifa za uzushi kuwa kocha huyo ameondoka Yanga kutokana na madai ya mishahara
"Nawaomba wale wanaoeneza habari za uzushi kunihusu mimi na klabu ya Yanga waache mara moja kwani hawanitendei haki mimi wala Yanga"
"Mimi ndiye niliyeandika barua kwa uongozi wa Yanga nikiomba niondoke nikatibiwe baada ya kupewa ushauri na madaktari wangu"
"Sidai chochote Yanga, wala sina tatizo lolote na uongozi wa Yanga. Hii ni mara ya pili nimerudi Yanga hilo linadhihirisha ni kiasi gani Yanga wanatambua, wanajali na kuthamini kile ninachokifanya"
"Nawaomba tuwe na matumizi mazuri ya mitandao ya kijamii, hakuna haja ya kutumia mitandao kuchonganisha watu na taasisi kwa masuala ambayo hayana ukweli wowote," alisema Mwambusi
Mwambusi anatarajiwa kufanyiwa upasuaji kumaliza changamoto ya jino linalomsababishia maumivu makali ya kichwa
Anatibiwa katika Hospitali ya Taifa ya Muhimbili
