Kasi aliyokuja nayo kocha mkuu wa Yanga Cedric Kaze ni wazi imewapa presha watani zao Simba sasa wanahaha kulisuka upya benchi lao la ufundi
Kaze aliyetua Yanga katikati ya mwezi Oktoba, kwa kiasi kikubwa amefanikiwa kukibadili kikosi cha mabingwa hao wa kihistoria akibaki kileleni mwa msimamo wa ligi baada ya duru ya kwanza kukamilika
Yanga ya Kaze iko imara sana, ile dhamira ya kutwaa ubingwa msimu huu sasa inaonekana waziwazi
Pamoja na Simba kudai wanafanya usajili kwa ajili ya michuano ya ligi ya mabingwa, lakini ni wazi kipaumbele chao namba moja ni kukabiliana na Yanga katika mbio za ubingwa wa Bara kwa kuwa huko michuano ya Kimataifa hakuna uhakika wa 'kutoboa' katika kundi walilomo
Simba wameongeza takribani watu wanne katika benchi lao la ufundi akiwemo Kocha Mkuu
Lakini pia wamemsajili mchezaji kama Perfect Chikwende ambaye huyu hawezi kucheza ligi ya mabingwa kwa kuwa tayari ameitumikia Platinum Fc
Pia upo usajili wenye utata ambao unatuhumiwa kufanywa nje ya muda wa usajili, Doxa Gikanji . Inadaiwa Gikanji ameongezwa 'kinyemela' katika kikosi chao kinachocheza ligi kuu wakimuondoa kiungo ambaye walimsajili mapema Taddeo Lwanga ambaye alionekana Zanzibar kwenye michuano ya kombe la Mapinduzi
Aidha Gikanji taarifa zake za usajili Simba zilivuja zikionyesha amesajiliwa akiwa Mtanzania wakati mchezaji huyo yuko Cameroon na kikosi cha DR Congo
Wadadisi wa mambo wanasema huyu anaweza kuwa sababu ya TFF hivi karibuni kutangaza kuongeza muda wa timu kufanya masahihisho ya usajili waliofanya kwenye dirisha dogo kwa wale waliokosea majina ya wachezaji na uraia
Ni wazi ngwe hii ya lala salama ni kufa na kupona kwa Yanga kuhakikisha inatimiza lengo lake la kutwaa ubingwa kwani ushindani unatarajiwa kuwa mkubwa
Aidha ni wakati ambao TAKUKURU watahitajika sana kutupia jicho nyendo ya baadhi ya timu kwani upo uwezekano wapo watakaofanya hata yasiyowezekana katika mpira ili mradi tu, washinde
