Baada ya kuongeza nyota watatu dirisha dogo, kocha mkuu wa Yanga Cedric Kaze anaamini kikosi chake sasa kimekamilika na wako tayari kupigania ubingwa wa ligi kuu ya Vodacom
Yanga ndio vinara wa ligi wakiwa na pointi 44, baada ya kushuka dimbani mara 18, wakiwa mbele ya watani zao Simba kwa tofauti ya alama tisa pamoja na kuwa Simba bado wana michezo mitatu ya kiporo
Kaze mesema ana kikosi imara ambacho kina uwezo wa kupambana na timu zote zinazoshiriki Ligi Kuu Tanzania Bara, kwa sababu ndio mashindano makubwa waliyonayo pamoja na michuano ya Kombe la FA.
Kocha huyo alisema alilazimika kuongeza 'majembe' katika kikosi chake kwa sababu anafahamu wazi hakuna mechi nyepesi kwenye Ligi Kuu Tanzania Bara na Kombe la FA ambayo inachezwa kwa mtindo wa mtoano.
"Malengo yetu msimu huu ni kuchukua ubingwa, ninajua wanachokitaka mashabiki wa Yanga, nimekuja kuwapatia furaha hiyo, malengo yetu ni kuwa na msimu yenye furaha, tumejiandaa na tumejipanga kupambana na timu zote, hatutadharau mchezo wowote," alisema Kaze.
Aliongeza amekuwa akiwapa mbinu tofauti wachezaji wake ili kucheza kwa malengo na kwa sasa kila mmoja anatekeleza maelekezo kwa kiasi kikubwa.
"Wachezaji wangu wanazidi kuwa bora na imara kila siku zinavyokwenda, tunakumbushana mbinu mbalimbali kulingana na aina ya timu tunayokutana nayo, kikubwa ni kuendelea kupambana kuchukua pointi katika kila mechi ili tufikie malengo," Kaze aliongeza.
Kuhusu kiungo nyota wa timu hiyo, Carlos Carlinhos, alisema anatarajia kurejea kikosini kuungana na wachezaji wenzake baada ya majeraha yake kuendelea vizuri.
Alisema kwa sasa kiungo huyo yupo tayari kuanza mazoezi mepesi, ikiwamo ya kwenda Gym, lakini akiendelea kufuata programu nyingine chini ya usimamizi wa madaktari kabla ya kuungana na wenzake atakapokuwa fiti kuanza kuingia uwanjani
