Kocha Msaidizi wa Yanga, Juma Mwambusi, amesema usajili ambao umefanywa katika safu yao ya ushambuliaji, sasa unawapa jeuri ya kutamka kwamba, hakuna timu itakayowazuia kufikia malengo yao ya kutwaa ubingwa Ligi Kuu Tanzania Bara
Mwambusi aliyewahi kutamba akiwa kocha wa Mbeya City, amesema msimu huu wako vizuri na wana imani kwa mwenendo wa timu yao hakuna itakayowasumbua.
Alisema malengo yao makubwa msimu huu ni kufanya vizuri kila mechi iliyopo mbele yao na kwamba baada ya kutwaa Kombe la Mapinduzi sasa wako imara zaidi kwa ajili ya Ligi Kuu.
"Tumefanya usajili wa wachezaji watatu, Saidi Ntibazonkiza ambaye tayari ameonekana makali yake, lakini pia kuna Dickson Job na tumefunga dirisha kwa kuimarisha safu ya ushambuliaji kwa Fiston Abdul Razak.
"Tumeongeza watu wa kazi watakaoleta ushindani na kuimarisha kikosi, ninaimani tutakaporejea kutoka mapumziko tunaendelea tulipoishia ni kutafuta pointi tatu kila mechi," alisema Mwambusi
Baada ya kurejea kutoka visiwani Zanzibar kocha mkuu wa Yanga Cedric Kaza aliwapa wachezaji mapumziko ya siku 10, wote watarejea kambini wiki ijayo kuendelea na maandalizi ya mzunguko wa pili
