Mwenyekiti wa Yanga Dkt. Mshindo Msolla ameeleza kuridhishwa na matokeo ambayo Yanga wamepata katika michezo 17 ya duru ya kwanza ya ligi na kuwa na matumaini ya kufanya vizuri katika michezo ya duru ya pili ya kumalizia ligi
Dk Msolla amesema Kocha Cedric Kaze amefanya kazi kubwa ya kutengeneza kikosi imara licha ya kuwa hakuanza na timu tangu mwanzo wa msimu
"Nikizungumza kwa uelewa wangu kama kocha wa soka,inawezekana tukafanya vizuri zaidi katika mzunguko wa pili kwani katika duru hili la kwanza kocha wetu (Cedric Kaze) aliukuta katikati lakini amepambana kuingiza ubora na sasa tuko hivi"
"Kocha amewafahamu wachezaji wake nao wamemjua kocha wao na wanatambua nini anakitaka kutoka kwao
"Baada ya mapumziko ya CHAN na Mapinduzi Cup baada ya kumaliza mchezo wa Prisons, nadhani tutakuwa na timu bora na ngumu zaidi"
"Kama uongozi tunaridhika sana na kazi inayofanywa na makocha wetu kuanzia mkuu wao Kaze lakini pia ubora mkubwa wanaouonyesha wachezaji wetu katika mechi zote 17 walizocheza mpaka sasa," alisema Dk Msolla
Baada ya mchezo dhidi ya Tanzania Prisons, Disemba 31, Yanga itaelekea Zanzibar kushiriki michuano ya kombe la Mapinduzi na baadae kufuata mapumziko ya michuano ya CHAN
Yanga iko kileleni mwa msimamo wa ligi ikijikusanyia alama 43, wakimaliza duru ya kwanza bila kupoteza mchezo
