Msimu miwili nyuma, aliyekuwa Katibu Mkuu wa Yanga Charles Mkwasa 'Master' sasa kocha wa Ruvu Shooting, alikuja na mbinu ya usajili wa 'kimyakimya' baada ya kubaini baadhi timu hasa Simba na Azam Fc zilikuwa zikifanya usajili wao kwa kutumia tetesi za usajili wa Yanga
Timu hizo zilisubiri kusikia Yanga wanamtaka nani kisha haraka zinakwenda kusajili, bahati mbaya wakati huo Yanga haikuwa na uwezo mkubwa wa kifedha
Jambo hilo halijabadilika kwani miamba hao wa soka katika sajili zao bado wanapita mulemule kwenye kivuli cha Yanga ingawa usajili uliopita wamelishwa sana 'matango pori'
Angalia baadhi ya wachezaji waliosajiliwa na Azam Fc kama Ally Niyonzima, Awesu Awesu na sasa Mpiana Monzinzi wote walianza kutajwa kuwaniwa na Yanga
Monzinzi alitajwa sana kukaribia kutua Yanga kabla ya mabingwa hao wa kihistoria kumsajili Michael Sarpong aliyekuwa akiitumia Rayon Sports
Hata Simba wachezaji kama Luis Miquissone, Larry Bwalya na hata Ibrahim Ame walitajwa kuwaniwa na Yanga
Zaidi Simba walikwenda mbali zaidi kwa kumsajili Bernard Morrison katika mazingira ambayo yalijaa utata mwingi
Lakini pia katika kikosi cha Simba wapo wachezaji kama Beno Kakolanya, Ibrahim Ajib na Gadiel Michael nao waliwasajili baada ya kumaliza mikataba Yanga
Taratibu mambo yameanza kubadilika kwani tangu ujio wa GSM, Yanga imeongeza umakini katika usajili wake, wameweza kuwasajili wachezaji wote waliowahitaji, katika baadhi ya sajili 'fedhwa' iliongea
Haikuwa kazi rahisi kuunda kikosi imara cha Yanga ambacho kimemaliza duru ya kwanza ligi kuu ya Vodacom bila ya kupoteza mchezo
Injinia Hersi Said upande wa GSM akishirikiana na viongozi wa Yanga, wamefanikiwa kuirejesha heshima ya Yanga kuanzia kwenye usajili
Sasa sio rahisi tena kwa mchezaji anayetakiwa na Yanga kusajiliwa na Simba au Azam
