Kikosi cha Yanga Alasiri ya leo kitashuka kunako uwanja wa Sokoine mkoani Mbeya kuikabili Ihefu fc katika mchezo wa ligi kuu ya Vodacom
Mchezo huo utapigwa kuanzia saa tisa Alasiri
Huu ni mchezo mwingine ambao kocha Cedric Kaze atahitaji kuchanga karata zake vyema ili kuona anaondoka na alama zote tatu
Kaze ametumia kikosi chake imara michezo mitano iliyopita na alifanikiwa kuondoka na alama zote 15
Mchezo wa leo hautarajiwi kuwa na mabadiliko makubwa upande wa kikosi, zaidi Wananchi pengine wataweza kumshuhudia Saido Ntibazonkiza akianza kwenye kikosi cha kwanza
Ntibazonkiza alikuwa chachu ya ushindi mchezo uliopita dhidi ya Dodoma Jiji akifunga bao moja na kutengeneza jingine Yanga ikishinda mabao 3-1
Katika mchezo huo Ntibazonkiza alicheza kwa dakika 45 tu
Yanga imepania kushinda mchezo huo ili kuhakikisha wanafunga mzunguuko wa kwanza wakiwa hawajapoteza mchezo na muhimu zaidi kuiendelea kujikita kileleni mwa msimamo wa ligi
