Jioni ya jana Disemba 21 Mji wa Mbeya ulizizima kwa shangwe baada ya klabu ya Yanga kutua kuelekea mchezo wao wa ligi kuu dhidi ya Ihefu Fc utakaopigwa kesho Jumatano kwenye uwanja wa Sokoine
Ndio! Wakati huu ni raha sana kuwa shabiki wa Yanga kwani jambo moja la uhakika ni kuwa, unapokwenda uwanjani kuwashuhudia vijana wa kocha Cedric Kaze, utarejea nyumbani na furaha
Leo Yanga itafanya mazoezi yake ya mwisho katika uwanja wa Sokoine kuelekea mchezo huo ambao unatarajiwa kuwa na ushindani mkali
Yanga ndio timu pekee ambayo haijapoteza mchezo msimu huu hivyo kila timu inayokutana nayo, inatamani kuwa timu ya kwanza kushinda dhidi ya vinara hao wa ligi
Ihefu Fc imejiimarisha kipindi hiki cha dirisha dogo ikiongeza wachezaji kadhaa pamoja na ujio wa kocha Zuberi Katwila
Wameshinda mechi mbili zilizopita, mchezo wa mwisho wakiwapiga KMC bao 1-0 hapohapo Sokoine
Hata hivyo itawalazimu wafanye kazi ya ziada kuwadhibiti nyota wa Yanga ambao sasa wamenoga zaidi kutokana ujio wa Saido Ntibazonkiza
