Wananchi wako Arusha, saa kumi jioni watashuka uwanja wa Sheikh Amri Abeid kuikabili Dodoma Jiji katika mchezo wa ligi kuu ya Vodacom
Yanga iko 'on-fire' kwani imeshinda mechi nne zilizopita huku ikiishushia Mwadui Fc kipigo cha mbwa koko katika mchezo uliopita, Wananchi wakishinda mabao 5-0
Kocha Cedric Kaze ameanza kufanikiwa kimbinu, sasa vijana wake hawamuangushi kwani ni mwendo wa kugawa dozi tu
Kikosi cha Kaze leo hakitarajiwi kuwa na mabadiliko makubwa. Ndivyo ilivyo, kocha hapaswi kubadili timu yake ya ushindi kama anataka kuendelea kupata matokeo
Mabadiliko pekee ambayo yanaweza kuonekana pengine ni kuanzishwa kwa Saido Ntibazonkiza ambaye anaweza kuchukua nafasi ya Deus Kaseke katika kikosi kilichoanza mchezo uliopita
Pia, Kaze anaweza kumpa mapumziko winga Tuisila Kisinda ambaye alipata majeraha mchezo uliopita. Kisinda alirejea kikosini na alikuwa miongoni mwa wachezaji walioshiriki mazoezi ya mwisho hapo jana. Kucheza kwake kutategemea na utimamu wake wa mwili
Ukuta wa Yanga unatarajiwa kuendelea kuwa salama chini ya Metacha, Kibwana, Yassin, Lamine na Mwamnyeto wakati pale kati mafundi Feisal Salum na Mukoko Tomombe wanaweza kuendelea kushirikiana
Farid Mussa alikuwa bora sana kwenye mchezo wa kirafiki dhidi ya Singida United, pengine leo anaweza kuwa na nafasi ya kuanza kwenye kikosi cha kwanza
Yacouba ndio 'DJ wa Shoo' kwa sasa kwani uwepo wake pale mbele kwenye safu ya ushambuliaji umeipa Yanga mafanikio katika mechi nne zilizopita
Pamoja na kuwa mwenendo wake wa kuzifumania nyavu sio mzuri, Michael Sarpong ni mtu muhimu sana kwenye safu ya ushambuliaji
Sarpong ni msumbufu, mara nyingi amewaweka katika presha walinzi wa timu pinzani
Amekuwa na maelewano mazuri na Yacouba pamoja na Deus Kaseke aliyenufaika zaidi kupitia kwake kwani mara nyingi Kaseke huingia eneo la ushambuliaji pale Sarpong anapowahamisha mabeki pembeni
Leo ni mechi nyingine ambayo Wananchi wanasubiri kushangilia ushindi, hakuna shaka Kaze atashusha kikosi chake cha maangamizi
