Mkurugenzi wa Uwekezaji GSM, ambaye pia ni Bosi wa Kamati ya Usajili Yanga Mhandisi Hersi Said amesema mpaka sasa mezani wana ofa za wachezaji watatu wanaotakiwa na timu nyingine
Hata hivyo Hersi amesisitiza kwa wakati huu hawako tayari kumuachia mchezaji wao yeyote wa kikosi cha kwanza kwani wanaweza kuvuruga malengo yao ya kujenga kikosi imara kwa ajili ya kuwania ubingwa msimu huu
Hivi karibuni ziliibuka tetesi kuwa klabu ya TP Mazembe imevutiwa na kiungo Feisal Salum 'Fei Toto' pamoja na beki kisiki Bakari Nondo Mwamnyeto huku Mcongomani Mukoko Tomombe akiivutia timu moja kutoka Arabuni
"Ni kweli wachezaji wetu wengi wanahitajika na timu nyingine, mpaka sasa tuna ofa kwa wachezaji watatu lakini huu sio muda sahihi wa kuwaachia wachezaji wanaoanza katika kikosi cha kwanza tupo katika kipindi cha kuijenga timu," alisema Hersi
GSM ndio wanaosimamia usajili wa Yanga, kwa kiasi kikubwa wamefanikiwa kuimarisha kikosi cha mabingwa hao wa kihistoria wakiwa vinara wa mbio za kuwania ubingwa wa ligi kuu msimu huu
Kazi hawajamaliza GSM kwani wakati huu wa usajili wa dirisha dogo wanatarajiwa kushusha mashine nyingine za kazi
