Uongozi wa klabu ya Yanga umewatoa hofu mashabiki wa timu hiyo kuhusu hali ya winga Tuisila Kisinda ambaye alipata majeraha kwenye mchezo dhidi ya Mwadui Fc hapo jana
Kisinda alifunga moja ya mabao matano ya Yanga katika ushindi dhidi ya Mwadui Fc, alishindwa kumaliza mchezo huo na nafasi yake kuchukuliwa na Farid Mussa
Daktari wa Yanga Dk Shecky Mngazija amesema nyota huyo alipata mshtuko wa goti na maumivu ya kawaida, wanaamini atakuwa sawa baada ya mapumziko ya siku chache aliyopewa
"Kisinda amefanyiwa uchunguzi wa kina, tumebaini alipata mshtuko wa goti baada ya kugongana na mchezaji mwenzake. Kwa sasa yuko sawa, maumivu aliyonayo yataisha kadri anavyoendelea kupumzika. Tunaamini ataweza kurejea mazoezi timu itakapokuwa mkoani Singida keshokutwa" alisema Dk Mngazija
Kisinda amejipambanua kuwa mchezaji muhimu katika kikosi cha kwanza cha Yanga, akiwa miongoni mwa wachezaji waliocheza dakika nyingi msimu huu
