Keshokutwa Jumapili Disemba 06, Yanga itashuka pale uwanja wa Benjamin Mkapa kuwakabili Ruvu Shooting katika mchezo wa ligi kuu ya Vodacom
Huu ni mchezo mihimu kwa timu ya Wananchi kukusanya alama nyingine tatu ambazo zitazidi kuwakita kileleni mwa msimamo wa ligi
Baada ya mchezo dhidi ya JKT Tanzania ambao Yanga ilishinda kwa bao 1-0, vijana wa kocha Cedric Kaze walipata muda wa wiki nzima kujiandaa na mchezo huu
Kabla Yanga ilikabiliwa na ratiba ngumu, ikicheza mechi tatu katika kipindi cha siku sita
Katika mchezo dhidi ya JKT Tanzania, wachezaji wa Yanga walionekana kuchoka hasa kwenye kipindi cha pili, Kaze alitaja sababu kuwa ilitokana na uchovu wa kucheza mechi mfululizo
Sasa Jumapili Ruvu Shooting watakumbana na Yanga ambayo iko 'fresh', utakuwa mchezo ambao walinzi wa Ruvu Shooting watakuwa 'busy' kupambana na kasi ya kina Tuisila Kisinda, yacouba Sogne na Deus Kaseke ambaye yuko kwenye kiwango bora sana
Lakini pia, nahodha Lamine Moro anatarajiwa kurejea kikosini baada ya kumaliza adhabu ya kutumikia kadi tatu za njano
Siku hiyo Wananchi pia wanaweza kumshuhudia Haruna Niyonzima 'Baba mzazi' ambaye mchezo uliopita hakupewa nafasi kwa kuwa alichelewa kurudi kutoka kwenye majukumu ya timu ya Taifa baada ya kupata ajali nchini Rwanda
Kama kawaida yake, Msemaji wa Ruvu Shooting Massau Bwire tayari ameanza tambo zake, akidai kuwa watatoa haki sawa baada ya kuwafunga Simba basi itakuwa zamu ya Yanga
Bwire anapata jeuri ya kutamba kutokana na uimara wa kikosi cha Ruvu Shootinga msimu huu
Maafande hao wanaonolewa na kocha Charles Mkwasa 'Master', wanashika nafasi ya nne wakiwa wamejikusanyia alama 23 sawa na Simba wakizidiwa mabao tu
Ruvu Shooting ni moja ya timu zinazocheza kandanda safi msimu huu, bila shaka mashabiki watashuhudia burudani ya aina yake
