Afisa Habari wa zamani wa klabu ya Yanga ambaye kwa sasa ni Afisa Masoko, Dismas Ten 'amewapiga dongo' Simba kuwa harakati zao za kujaribu kumsajili kiungo Feisal Salum 'Fei Toto' haziwezi kufanikiwa
Kwa nyakati tofauti imeelezwa kuwa Simba inamnyemelea Fei Toto kwa mbinu zilezile walizotumia kumnasa Bernard Morrison
Mwanzoni mwa msimu Yanga kupitia wadhamini GSM, walimpa Fei Toto mkataba wa miaka minne akiwa pengine ndiye mchezaji mwenye mkataba mrefu zaidi nchini
Ten amefichua kuwa Simba wamejaribu kuwasiliana na wazazi wa nyota huyo katika jitihada za kutaka kumshawishi ahamie upande wao. Amewapiga dongo kuwa wasijisumbue kwani hawana hela ya kumsajili Fei Toto
"Simba haina hela ya kumsajili Fei Toto, mnahangaikatu mara kwa mama ake mara kwa mjomba ake Feisal Salum hauzwi," aliandika Ten kwenye ukurasa wake wa mtandao wa kijamii
Kwa miaka ya karibuni Simba imetumia changamoto za kiuchumi zilizoikabili Yanga kusajili wachezaji kutoka Yanga jambo ambalo kwa sasa haitakuwa rahisi kutokea baada ya timu kuwa chini ya GSM. Aidha sakata la Bernard Morrison limewaongezea umakini zaidi viongozi wa Yanga
Juzi mshambuliaji Saido Ntibazonkiza alifichua kuwa viongozi wa Simba walijaribu kumshawishi aachane na mpango wa kujiunga na Yanga ili wamsajili ashiriki michuano ya Kimataifa
Hata hivyo nyota huyo kutoka Burundi aligoma na kuwataarifu GSM na viongozi wa Yanga juu ya watu hao waliokuwa wakimsumbua
