Moja ya sifa kubwa ya mshambuliaji wa Yanga Ditram Nchimbi 'Duma', ni mchezaji mwenye 'mapafu ya mbwa', ni mpambanaji asiyechoka lakini pia jina la Duma alilipata kutokana na kasi yake awapo uwanjani
Nchimbi ameendelea kuwa mchezaji kipenzi cha makocha wengi licha ya ukosoaji wa hapa na pale kutoka kwa mashabiki
Ni mchezaji ambaye hutumika sana uwanjani, kama hainufaishi timu kwa kufunga moja kwa moja, basi atatoa asisti au hata harakati zake tu zinaweza kupelekea mazingira ya nafasi za mabao kutengenezwa
Juzi alikuwa nguzo muhimu kwenye kikosi cha timu ya Taifa ambacho kililazimishwa sare ya bao 1-1 dhidi ya Tunisia
Ndiye mchezaji aliyeisumbua sana ngome ya Tunisia, ilibaki kidogo tu aifungie Stars bao la ushindi kwenye dakika za majeruhi kama sio mpira wake wa kichwa kuikosa tageti kwa sentimita chache tu
Nchimbi pamoja na wachezaji wengine waliokuwa na majukumu ya timu ya Taifa, wamerejea kikosini kujiandaa na mchezo dhidi ya Namungo Fc ambao utapigwa Jumapili uwanja wa Benjamin Mkapa
Baada ya kulazimishwa sare katika michezo miwili iliyopita, huu ni mchezo ambao Yanga itahitaji kuondoka na alama zote tatu
