Hongera watani zetu kwa hatua mliyofikia

Yanga na Simba ni vilabu vikongwe zaidi nchini Tanzania. Kwa miaka mingi timu hizi zimekuwa zikimilikiwa na wanachama.

Aidha uendeshaji wake umekuwa wa kutegemea zaidi wafadhili na michango ya wanachama kwa kuwa zimekuwa hazijiendeshi kibiashara.

Lakini hatua iliyofikiwa na watani wetu Simba ya kubadili Katiba yao na kuifanya timu yao ijiendeshe kibiashara si ya kubezwa hata kidogo.

Naamini mwekezaji waliompata jana, Mohammedi Dewji ambaye anamiliki hisa kwa asilimia 50 kwa kushirikiana na wanahisa wengine wataweza kufanya mabadiliko ya kweli katika klabu hiyo.

Bila shaka wataanza kufanya mambo yao kwa weledi na huo huenda ukawa mwanzo wao wa mafanikio.

Wakati wenzetu wakipiga hatua hiyo nasi hatuna budi kujitafakari. Hakuna shaka kuwa Yanga nayo inahitaji mabadiliko katika uwendeshaji wake ili kuendelea kuwa mbabe wa soka la Tanzania.

Mabadiliko yataiondoa timu kutoka katika utegemezi wa watu na hivyo ndivyo uendeshaji wa soka la kisasa unataka.

Tukiendelea kuamini kwamba tutafanikiwa kwa mfumo huu huu tulioanao tutakuwa tunajidanganya.

Changamoto zinazoikumba klabu kwa sasa ndio iwe chachu ya kuyafuata mabadiliko.

Ni wakati muafaka kwa WanaYanga kushinikiza viongozi wao waende na wakati.

Natambua Yanga pengine ingekuwa ya kwanza kufanya mabadiliko lakini imekuwa ikikumbana na vikwazo kila inapoanza mchakato.

Jambo hilo linagharama yake. Lazima ifike muda wanachama wa Yanga wakabadili fikra zao, wakubaliane na uhalisia wa wakati.