Mwenyekiti wa klau ya Yanga Dk Mshindo Msolla amewataka wapenzi na Wanachama wa klabu hiyo kuwa watulivu wakati Mshauri wa klabu Senzo Mazingisa akihojiwa na Jeshi la Polisi kwa tuhuma za kuihujumu Simba
Akizungumza mbashara kupitia kurasa za mitandao ya kijamii za Yanga, Dk Msolla amesema uongozi wa Yanga unaamini Senzo hakufanya kosa lolote na watakuwa tayari kutoa ushirikiano wowote utakaohitajika na Jeshi la Polisi
Dk Msolla amewataka Wanayanga wasiyumbishwe na haya yanayoendelea, waweke mkazo katika malengo yao kuhakikisha wanakamilisha mchakato wa Mabadiliko ya mfumo wa uendeshaji pamoja na kutwaa ubingwa wa ligi kuu
"Sisi viongozi tunaamini Senzo hakufanya kosa lolote hivyo tutakuwa nae bega kwa bega na tutatoa ushirikiano kwa Jeshi la Polisi kuhakikisha jambo hili linamalizika"
"Kwa mashabiki wetu ni muhimu kuwa wamoja, wasiyumbishwe na taarifa za mitaani. Tuna malengo mawili makubwa msimu huu kubadili mfumo wa uendeshaji wa klabu yetu pamoja na kutwaa ubingwa wa nchi," alisema Dk Msolla
Nae mshauri wa Yanga Senzo Mazingisa ameeleza kusikitishwa na kitendo kilichofanywa na Simba lakini ameahidi kuwa atashirikiana na Jeshi la Polisi katika uchunguzi wao ili kuhakikisha jambo hili linafika mwisho
Mapema leo Kamanda wa Polisi Mkoa wa Kinondoni, Edward Bukombe alisema walimuhoji Senzo jana lakini aliachiwa huru bila ya masharti kwa kuwa hakuna kesi iliyofunguliwa dhidi yake
