Umekuwa mwanzo mzuri sana wa msimu kwa mashabiki wa Yanga ambao wameishuhudia timu yao ikicheza mechi 10 bila ya kupoteza mchezo
Baada ya misimu mitatu ya machozi, jasho na damu, hatimaye msimu huu Wanayanga wanalo la kujivunia kutokana na uimara wa kikosi chao
Habari njema zaidi ni kuwa mambo yataendelea kunoga pale Jangwani kwani kikosi kimeendelea kuimarishwa
Mwezi uliopita Yanga ilitangaza kuinasa saini ya kiungo mshambuliaji Saido Ntibazonkiza raia wa Burundi ambaye anakuja kuungana na kocha Cedric Kaze ambaye ana asili ya nchi hiyo
Ntibazonkiza anaanza rasmi kuitumikia Yanga Novemba 15 ikiwa ni siku ya kwanza rasmi ambayo mkataba wake unaanza
Nyota huyu atajiunga na mabingwa hao wa kihistoria baada ya kumaliza majukumu na timu yake ya Taifa
Ntibazonkiza ni silaha muhimu sana kwa Yanga, anakwenda kumaliza changamoto katika eneo la ushambuliaji ambalo kasi yake imekuwa ndogo
Ntibazonkiza ni namba 10 asilia, nafasi ambayo ndani ya kikosi cha Yanga imekosa mtu wa kudumu
Inaelezwa GSM pia wamepanga kuongeza mshambuliaji mwingine mwenye uwezo mkubwa zaidi wa kufunga katika usajili wa dirisha dogo
Injinia Hersi Said anaweza kurejea pale DR Congo kumalizana na ile injini yao ya mabao Jean Mark Makusu
Msimu huu hesabu za Yanga ni kutwaa ubingwa wa ligi kuu ili kupata tiketi ya kushiriki michuano ya ligi ya mabingwa msimu ujao
