Yanga imelazimishwa suluhu ya bila kufungana dhidi ya Gwambina Fc katika mchezo wa ligi kuu ya Vodacom uliopigwa, Misungwi Mwanza
Matokeo haya hayakufurahiwa na baadhi ya mashabiki ambao wametoka kuishuhudia timu yao ikishinda michezo saba mfululizo
Aidha uamuzi wa kocha Cedric Kaze kufanya 'rotation' ya kikosi, umetupiwa lawama lakini bila shaka ni uamuzi uliokuwa na mlengo wa kimkakati zaidi
Ikumbukwe Yanga imekabikiwa na mechi nne katika kipindi cha siku 12
Mechi tatu za mwanzo Kaze hakufanya mabadiliko makubwa ya kikosi chake, leo aliona kuna umuhimu wa kuwapumzisha baadhi ya wachezaji baada ya kucheza mfululizo
Lakini pia ikumbukwe Jumamosi Yanga inakabiliwa na mchezo mgumu dhidi ya Simba. Pengine ni tahadhari aliyochukua kuwaepusha nyota wake na majeraha
Yanga imesajili wachezaji 25, mabadiliko ya kikosi leo yamewapa fursa wachezaji wengine kuonyesha kile walichonacho kumpa sababu ya kuwapa nafasi
Pamoja na kuwa Yanga haijashinda lakini muhimu zaidi Kaze amethubutu kuwaamini wachezaji wake.
Mara nyingi kwenye mahojiano yake, Kaze amesisitiza kuwa anaunda timu ya wachezaji 11 na sio watu 11.
Wakati ufike kila mchezaji Yanga awe na umuhimu wake, na kuwa mchezaji mmoja akikosekana sio tatizo kwa timu
