Kocha Mkuu wa Yanga Cedric Kaze amesema ataendelea kufanya mabadiliko ya kikosi chake kulingana na mpango wa mechi inayokuja mbele yake
Katika michezo miwili ambayo ameiongoza Yanga na kufanikiwa kushinda yote, Kaze alionekana kufanya mabadiliko kadhaa katika kikosi chake
Mchezo dhidi ya Polisi Tanzania alianza na mshambuliaji mmoja, Yacouba Sogne lakini mchezo dhidi ya KMC akawaanzisha Waziri Junior na Michael Sarpong
Kaze amesema katika kipindi cha siku 12, timu yake inacheza mechi nne hivyo ni muhimu kwa wachezaji kupokelezana majukumu
"Tunacheza michezo minne katika siku 12, hivyo hakuna mchezaji ambaye ana uhakika wa kuanza mechi zote. Baadhi ya wachezaji hawakuwa wamecheza kwa muda mrefu hivyo ni vyema kuwatumia kwa tahadhari kuwaepusha na majeraha"
"Lakini pia uwanja wa CCM Kirumba ni tofauti na uwanja wa Uhuru tuliocheza mchezo uliopita, tulianza na washambuliaji wawili baada ya kubaini hatutakuwa na muda mwingi wa kucheza mchezo wetu, wakati mwingine tulihitaji kutumia mipira mirefu," alisema
Kaze amesisitiza kuwa ligi ya Tanzania ni ngumu hivyo wanapaswa kujiandaa sawasawa kwani hakuna timu nyepesi
Ijumaa ya wiki hii kikosi chake kitakuwa Musoma kuikabili Biashara United katika mechi nyingine ngumu
Biashara United inashika nafasi ya tatu kwenye msimamo wa ligi ikiwa na alama 16
