Alhamisi ijayo Oktoba 24 kikosi cha Yanga kitashuka dimba la Benjamin Mkapa kuikabili Polisi Tanzania ukiwa ni mchezo wa raundi ya saba ligi kuu ya Vodacom
Mchezo huo utakuwa wa kwanza kwa kocha mkuu wa Yanga Cedric Kaze aliyetua juzi usiku na jana akasaini mkataba wa miaka miwili
Raia huyo wa Burundi leo anatarajiwa kuanza kuwanoa vijana wake, akiahidi mabadiliko ya uchezaji wa timu yake mapema tu kwenye mchezo wake huo wa kwanza
"Tutakuwa na siku nne za maandalizi kabla ya mchezo wetu unaofuata. Natarajia kuwa na vipindi saba vya mazoezi. Ni muda mchache lakini mashabiki watarajie kuanza kushuhudia mabadiliko namna vile tutakavyokuwa tukicheza," alisema Kaze ambaye tayari ametua Kigamboni kuanza majukumu yake
Kaze aka 'Guardiola wa Kirundi' ameweka bayana kuwa anataka kuiona timu yake ikicheza mbali zaidi ya lango lake na kuwa vijana wake wanapaswa kumiliki mchezo kwa muda wote
Ni mfumo ambao utahitaji wachezaji kuwa timamu kwelikweli kwani mbinu hii inawafanya wacheze pamoja wanaposhambulia na hata wakati wa kuzuia
Mpango wa mfumo huu ulianza kutekelezwa mapema na kocha msaidizi Juma Mwambusi ambaye baada ya Zlatko Krmpotic kutimuliwa, aliwaongezea wachezaji muda wa kufanya mazoezi, wakijifua mara mbili kwa siku lengo likiwa kuwafanya wawe na uwezo wa kucheza dakika 120 bila ya kuchoka
