Ujio wa Kocha Cedric Kaze umepokelewa kwa furaha na mashabiki wa klabu ya Yanga kutokana na sababu kuu mbili
Kwanza Wanayanga wanafahamu asili ya soka la klabu yao, ni kushambulia na kufunga mabao
Kwa takribani misimu mitatu, utamaduni huo ni kama ulipotea tangu alipoondoka Mdachi Hans van Pluijm mwaka 2016
Babu Hans aliondoka na Yanga ile ya kukimbiza 'mpera-mpera'
Ni shauku la kila Mwanayanga kuona utamaduni ule unarejea, ujio wa Kaze umewapa matumaini mapya, kwa nini?
Kaze ni muumini wa soka la kushambulia, amelifundisha soka hilo hata kabla hajakwenda Ulaya mwaka 2012
Lakini pia, kafanya kazi kwenye Academy za FC Barcelona kwa takribani misimu mitano, ni wazi atakuwa ameiva kwelikweli kimbinu
Hakuna mtu asiyependa mifumo na kimbinu zinazotumiwa na Fc Barcelona, wanacheza 'tiki-taka', ni mwendo wa burudani na mabao tu
Pili, Wanayanga wanapenda kuona timu yao inarejesha ufalme wake katika soka la nchi hii na pengine sasa ni wakati wa kuvuka mipaka
Hii heshima ya kuitwa mabingwa wa kihistoria haikuja kwa bahati mbaya. Ukienda pale Jangwani yalipo Makao Makuu ya Yanga, ingia ofisi ya Mtendaji wa klabu ushuhudie utitiri wa Makombe
Changamoto za kiuchumi ziliiyumbisha timu misimu mitatu iliyopita ambayo watani zao Simba wametumia mwanya huo kujiimarisha
Lakini sasa baada ya GSM kufanya uwekezaji mkubwa hasa kwa usajili kabambe msimu huu, wengi wanadhani ni wakati wa Yanga kurejea mahali walipozoea
Kaze ameahidi kuwarejesha Yanga mahali hapo, na kuwa Wanayanga watarajie mambo makubwa kutoka kwake
Amesema ataboresha mbinu za timu akihakikisha wanatumia mfumo wa kisasa lengo likiwa kuwapa furaha mashabiki na wakati huohuo wakitimiza malengo yaliyowekwa
Kaze ametua Yanga huku akifahamu atakabiliwa na presha kubwa ya mashabiki ambao wamechoka kuumizwa na mwenendo wa timu yao
Ameonyesha utayari na kujivunia kujiunga na Yanga wakati huu, atafanya kazi usiku na mchana ili kuhakikisha furaha ya Wanayanga inarejea
