Mwenyekiti wa klabu ya Yanga Dk Mshindo Msolla amewataka wachezaji wa klabu hiyo kusimama imara kuhakikisha wanatimiza malengo yaliyowekwa msimu huu
Aidha Dk Msolla amewataka wachezaji wasitetereshwe na mabadiliko ya benchi la ufundi yaliyofanyika, kwani hilo ni jambo la kawaida
Uongozi wa Yanga ulizungumza na wachezaji baada ya kuchukua uamuzi wa kumfuta kazi kocha Zlatko Krmpotic ambaye alidumu katika nafasi yake kwa siku 37 tu
"Kuondoka kwa kocha hakupaswi kuwatia unyonge, muhimu tunaamini katika uwezo wenu hivyo muendeleze kazi nzuri wakati huu ambao anatafutwa kocha mkuu mwingine"
"Mnafahamu kuwa timu inayohitaji mafanikio na inayojijenga kuna wakati inapitia katika hatua ngumu kama hizi . Kusudio letu ni kuona kwa pamoja tunaweza kufikia malengo tuliyojiwekea msimu huu" alisema
Yanga kwa sasa iko chini ya kocha msaidizi Juma Mwambusi aliyepewa jukumu la kuiandaa timu wakati kocha mkuu akisubiriwa kuwasili
Cedric Kaze raia wa Burundi ndiye anayetajwa kurithi mikoba ya Krmpotic
