Misimu ya 2014/15 na 2015/16 inabaki kuwa misimu bora sana ya Yanga katika kipindi cha miaka 10 iliyopita
Ni wakati huo ambao Yanga ilikuwa haikamatiki, ikicheza kandanda la burudani lililoambatana na idadi kubwa ya mabao
Mdachi Hans van Pluijm ndiye aliyekuwa kocha mkuu wa Mabingwa hao wa kihistoria akisaidiwa na Charles Mkwasa na baadae Juma Mwambusi, huyuhuyu kocha msaidizi wa Yanga sasa
Ni zama ambazo bado zinawaumiza Wanayanga kwani tangu wakati ule hawajashuhudia tena timu yao ikichezwa katika kiwango kile
Yanga inasaka kocha mwingine baada ya kumtimua Mserbia Zlatko Krmpotic aliyedumu kwa siku 37 tu
Amini, usiamini, Pluijm anaweza kuwa chaguo sahihi kurejea pale Yanga
Tofauti na makocha wengine wanaotajwa, Pluijm ndiye kocha wa mwisho kuifanya Yanga icheze vile wanavyotaka mashabiki
Uzoefu wake na soka la Tanzania inaweza kuwa faida zaidi kwake kulinganisha na makocha wengine
Wakati huu msimu ukiwa unaendelea, kumleta kocha ambaye hafahamu vyema soka la Tanzania kunaweza kuwa na athari
Kwa aina ya wachezaji ambao Yanga inao, kwa Pluijm inaweza kuwa kazi rahisi kuwaunganisha ndani ya muda mfupi
Kwani Pluijm ni kocha asiyehitaji muda mrefu kuifanya timu icheze kandanda la ushindani
Rejea alipoondoka Yanga na kujiunga na Singida United, baada ya muda mfupi tu akaifanya Singida United kuwa timu tishio
Pamoja na kuwa hakukaa Azam Fc kwa muda mrefu, aliweza kuifanya Azam kucheza soka la kuvutia
Wanayanga wametega sikio wakisubiri kumfahamu mrithi wa Krmpotic
Wakati huu wengi hawatapenda kuona uongozi unafanya bahati nasibu kama ilivyokuwa kwa kocha aliyepita
