Alisajiliwa na Yanga mahsusi kuchukua nafasi ya Papy Tshishimbi eneo la kiungo cha ukabaji, lakini ni wazi Mcongomani Mukoko Tomombe yeye ni zaidi ya kiungo mkabaji
Mukoko ameonyesha uwezo mkubwa wa kupachika mabao na sasa ndiye kinara wa kupachika mabao kwenye kikosi cha Yanga akiwa amefunga mabao manne
Mukoko amefunga bao moja kwenye ligi dhidi ya Kagera Sugar lakini amefunga mabao matatu katika mechi mbili za kirafiki
Aliwafunga Mlandege Fc na jana akawafunga KMKM mabao mawili
Katika mechi mbili zilizopita, benchi la ufundi la Yanga lilimsogeza juu aongeze mashambulizi wakati Fei Toto na Zawadi Mauya wakibaki chini
Wakati safu ya ushambuliaji ya Yanga ikiwa bado haijakaa sawa, uwepo wa wachezaji kama Mukoko umekuwa na mafanikio kwa kikosi cha mabingwa hao wa kihistoria
Mukoko, Lamine Moro, Waziri Jr na Michael Sarpong ndio wafungaji wa mabao tisa ya Yanga yaliyofungwa mpaka sasa katika mechi zote
