Ukiangalia takwimu, kocha Mkuu wa Yanga Zlatko Krmpotic hana baya pamoja na kuwa ndio kwanza mwezi mmoja umetimia tangu ajiunge na mabingwa hao wa kihistoria
Ushindi wa mabao 2-0 ambao Yanga iliupata dhidi ya KMKM jana katika mchezo wa kirafiki, unamfanya awe ameshinda mechi sita kati ya saba alizocheza (ligi na mechi za kirafiki)
Alishinda mchezo wa kilele cha wiki ya Mwananchi dhidi ya Aigle Noir, akalazimishwa sare mchezo dhidi ya Prisons kisha akashinda michezo ya Mbeya City, Mlandege, Kagera Sugar, Mtibwa Sugar na jana KMKM
Katika soka, kocha mzuri ni yule anayeisaidia timu kushinda, kwani kinachotakikana kwenye soka ni alama tatu tu
Haijalishi umechezaje lakini kama unashinda hilo sio tatizo
Pale Uingereza hakuna kocha ambaye mbinu zake zinakosolewa kama Jose Mourinho ambaye kwa sasa anaiona Tottenham
Lakini Morinho ametwaa mataji yote barani Ulaya katika ngazi ya vilabu, akiwazidi makocha wengi tu ambao wanasifika kwa timu zao kucheza soka la kuvutia
Kumekuwa na presha kubwa kwa Krmpotic, wasioitakia mema Yanga nao wamechukua nafasi kukoleza moto ili kuhakikisha kocha huyu anatimuliwa kabla ya mchezo dhidi ya Simba
Hili litakuwa jambo la kushangaza kama uongozi wa Yanga utaingia 'mkenge'. Unamfukuzaje kocha ambaye ameshinda zaidi ya asilimia 90 ya mechi alizocheza?
Wengi wetu hatuna utaalam wa ukocha lakini tunadhani tunafahamu zaidi kuliko waliosomea, tunashinikiza yale tunayoyataka sisi ndio yafanyike
Msimu huu Wanayanga hawapaswi kukubali kuyumbishwa, wanaoanzisha hii mijadala wana malengo yao
Wanajua kama Yanga itamtimua kocha leo, inaweza kupoteana kwa mechi kadhaa pale kocha mpya atakapokuwa akitengeneza kikosi chake. Hii ni nafasi kwao kutimiza malengo
Umoja uliionyeshwa kwa kuvikataa baadhi ya vyombo vya habari vinavyoonekana kutumika, basi umoja huohuo uonekane kuwakataa wale wanaoshinikiza Krmpotic aondoshwe kwani hawana nia nzuri na Yanga
Kocha anafukuzwa pale timu yake inapokuwa haifanyi vizuri, huu utabiri unaofanywa na baadhi ya watu kuwa chini ya kocha huyu Yanga haitafanya vizuri huko mbeleni sio sahihi
Wasioelewa ratiba ya Yanga ya ligi ilipangwa kimkakati zaidi ukilinganisha na watani zao Simba. Yanga imeanza na timu vigogo kama Tanzania Prisons, Kagera Sugar na Mtibwa Sugar, timu ambazo ni kawaidia kushinda mechi dhidi yao huwa sio jambo rahisi
Lakini Krmpotic ameivusha timu salama katika mechi hizo, pamoja na muda mfupi aliokaa na timu anastahili pongezi
Hakuna muujiza ambao utatokea kuifanya Yanga icheze kama wanavyotaka mashabiki, wachezaji wengi ni wageni, watahitaji muda kuelewana
Nafikiri presha ya mashabiki kwa sasa iwe katika kuhakikisha timu inashinda kila mchezo na sio jinsi timu inavyocheza kwani ukicheza vizuri bila ya kupata matokeo ni kazi bure
