Baada ya kumaliza kibabe ratiba ya mechi mbili za mikoani, kabla ya kukutana na Simba Oktoba 18 Yanga itaendelea kubaki jijini Dar es salaam, ikicheza mechi nyingine mbili kwenye uwanja wa Benjamin Mkapa
Hii ni nafasi kwa mabingwa hao wa kihistoria kujiimarisha zaidi kabla ya kukutana na watani zao Simba ambao wanapaswa kwenda kucheza na JKT Tanzania(Dodoma) na Tanzania Prisons(Rukwa) kabla ya mchezo wa Oktoba 18
Winga wa zamani wa Yanga Edibily Lunyamila amesema ratiba hiyo inaweza kuwanufaisha Yanga kwani tofauti na watani zao, wao watakuwa na muda wa kucheza na kuuzoea uwanja wa Mkapa
"Yanga watakuwa na faida ya wachezaji kupata muda wa kupumzika na kuuzoea zaidi uwanja wa Mkapa. Mechi watakazocheza kwenye uwanja huo kabla ya kukutana na Simba naamini zitawafanya wawe kwenye kiwango bora"
"Mechi za mikoa zina changamoto kuanzia kwenye viwanja, ni wazi Yanga hawatakubali kupoteza mechi dhidi ya Coastal Union na Polisi Tanzania baada ya kupata matokeo kule Kagera na Morogoro. Simba wao wanakwenda kucheza kwenye viwanja vigumu, na ikitokea hawakushinda mechi zao, inaweza kuathiri morali za wachezaji wao kuelekea mchezo dhidi ya Yanga," Lunyamila amenukuliwa na gezeti la Mwanaspoti
Yanga inachanga 'karata' zake kuhakikisha wanashinda mchezo huo dhidi ya watani zao Oktoba 18
Tayari wamerejea mazoezini kujiwinda na mchezo dhidi ya Coastal Union utakaopigwa Jumamosi lakini, kesho Jumatano watatest mitambo dhidi ya KMKM katika mchezo wa kirafiki
Kocha Zlatko Krmpotic bado anahitaji wachezaji wake wapate mechi nyingi ili kutengeneza muunganiko wa kikosi chake
Yanga inaweza kucheza mechi mbili za kirafiki kabla ya mchezo wa Oktoba 18
