Juzi kwenye mchezo dhidi ya Mtibwa Sugar, kocha mkuu wa Yanga Zlatko Krmpotic aliwafanyia 'sapraisi' mashabiki kwa kumjumuisha kiungo fundi Carlos Fernandez 'Carlinhos' kwenye kikos chake kilichoanza mchezo huo uliopigwa uwanja wa Jamhuri mkoani Morogoro
Kutokana na ubovu wa sehemu ya kuchezea ya uwanja ambao tayari umefungiwa na Bodi ya Ligi, wengi hawakutarajia kumuona Carlinhos akianza
Kocha Msaidizi wa Yanga Juma Mwambusi alisema ilikuwa mbinu kumuanzisha kiungo huyo na zaidi waliamua kumchezesha winga ili awe huru 'kumwaga maji'
Ni mbinu ambayo iliweza kuzaa matunda kwani ulikuwa mpira wake wa kona uliopelekea kupatikana kwa bao la Yanga lililofungwa na Lamine Moro
Kocha Krmpotic amesema ataendelea kumtumia Carlinhos katika mechi nyingine ambazo viwanja vyake ni changamoto
Mserbia huyo amesema wamekuwa wakifanya mazoezi aina ya mchezo wanaotumia katika mechi za nje ya jiji la Dar es salaam, mipira ya adhabu ni silaha muhimu kwao kutengeneza mabao Carlinhos anapokuwa uwanjani
"Ni mchezaji mwenye utaalam wa kupiga mipira. Mara nyingi krosi zake zimesababisha madhara kwenye lango la timu pinzani. Ni mchezaji tunayeweza kumtumia katika mazingira yoyote kulingana na mpango wa mechi husika," alisema Zlatko
Mpaka sasa Carlinhos amecheza mechi tatu za ligi, ametoa pasi mbili za mabao yote yakifungwa na Lamine Moro
Amekuwa akitengeneza nafasi nyingi kupitia mipira yake ya adhabu, hata hivyo bado mipira hiyo haijatendewa haki ipasavyo
