Kocha Mkuu wa Yanga Zlatko Krmpotic anaongoza maandalizi ya kikosi chake kuelekea mchezo dhidi ya Mtibwa Sugar mwishoni mwa wiki
Mserbia huyo msimu huu ameiongoza Yanga kupata ushindi katika michezo miwili na mmoja kutoka sare na kujikusanyia alama saba
Miongoni mwa maboresho ambayo aliahidi kufanya baada ya mchezo dhidi ya Kagera Sugar, ni katika safu ya ushambuliaji
Yanga imefunga bao moja tu kwenye kila mchezo iliyocheza, ni idadi ndogo ya mabao ukilinganisha na aina ya wachezaji walionao
Krmpotic amesema timu yake haina tatizo katika kutengeneza nafasi, changamoto iko kwenye matumizi ya nafas hizo kuzibadili kuwa mabao
"Sifurahishwi na idadi ya mabao ambao tumefunga, ni changamoto inayosababishwa na mambo mengi lakini muhimu tumeweka mkazo kuboresha eneo hili"
"Tutahakikisha washambuliaji wetu wanafunga mabao ya kutosha kutokana na nafasi ambazo zitapatikana kwa sababu kama tunaweza kushinda kwa kupata pointi tatu bila ya mabao mengi huenda ikawa shida kwetu huko mbele," alisema Krmpotic
Wafungaji wa mabao ya Yanga katika ligi mpaka sasa ni Michael Sarpong, Lamine Moro na Mukoko Tonombe
Sarpong atakuwa na nafasi ya kuongeza akaunti yake siku ya Jumapili pale uwanja wa Jamhuri wakati Yanga itakapokuwa mgeni wa Mtibwa Sugar
