Baada ya kulazimishwa sare ya bao 1-1 dhidi ya Tanzania Prisons katika mchezo wa ufunguzi ligi kuu ya Vodacom juzi, kocha mkuu wa Yanga Zlatko Krmpotic ameendelea kukiandaa kikosi chake kuelekea mchezo wa pili dhidi ya Mbeya City ambao utapigwa Jumapili ijayo
Yanga inajifua huko Kigamboni ilikoweka makazi yake, vijana wakifanya mazoezi mara mbili kwa siku
Katika moja ya changamoto ambazo Krmpotic alibainisha juzi baada ya mchezo, ni kikosi chake kutokuwa na utimamu wa kucheza kwa dakika 90
Krmpotic amewaongezea 'dozi' ya mazoezi wachezaji wake ili kuhakikisha anamaliza changamoto hiyo
Krmpotic anafahamu ashabiki hawatakuwa tayari kupokea matokeo tofauti na ushindi mchezo wa Jumapili
Mserbia huyo anahitaji kuchanga karata zake vizuri ili ahakikishe timu inapata matokeo na wakati huohuo akiendelea kukiimarisha kikosi chake
Kipaumbele cha Yanga msimu huu ni kutwaa ubingwa, kuendelea kuangusha alama mapema kunaweza kuvuruga mipango hiyo
Hili ni jambo ambalo Wanayanga hawatapenda kuliona msimu huu baada ya kuvumilia misimu mitatu bila kutwaa taji lolote
