Mabingwa wa kihistoria Tanzania, Yanga kesho Jumapili wanajambo lao pale uwanja wa Mkapa wakikabiliwa na mchezo wa kwanza wa ligi kuu msimu wa 2020/21 dhidi ya Tanzania Prisons
Ni mchezo unaotarajiwa kuwa na ushindani mkali kutokana na mazingira yake
Kwa Yanga ni mchezo ambao wanahitaji ushindi ili kuanza vyema kampeni ya kutwaa ubingwa wa ligi kuu msimu huu
Hata hivyo mara nyingi, Tanzania Prisons ni timu iliyojipambanua kutoa ushindani kwa vigogo wa soka nchini
Msimu uliopita Yanga ilifanikiwa kuchukua alama nne kati sita katika mechi baina yake na Prisons
Prisons wamebadili kocha ambapo sasa wananolewa na kocha Salum Mayanga ambaye alikuwa kocha wa Ruvu Shooting msimu uliopita
Ni huyu Mayanga ambaye msimu uliopita aliifunga Yanga kwenye mchezo wa kwanza wa ligi akiwa na Ruvu Shooting
Hata hivyo msimu huu atakutana na Yanga tofauti kabisa, ni timu iliyosukwa upya
Pengine katika kikosi atakachokutana nacho kesho, hakitakuwa na mchezaji hata mmoja ambaye alicheza mechi ya msimu uliopita
Ni Yanga yenye malengo makubwa, Yanga ambayo imedhamiria kwelikweli kushinda ubingwa baada ya kuupoteza kwa watani zao kwa misimu mitatu mfululizo
Lakini pia, mchezo huo utakuwa kibarua cha kwanza cha kocha Zlatko Krmpotic ambaye alianza kuinoa Yanga tangu Jumatatu iliyopita
Krmpotic anafahamu kilichomleta Tanzania ni kutwaa ubingwa na sio vinginevyo. Wakati akiendelea kuimarisha timu yake, hatahitaji kuanza kuangusha alama mapema hivi
Wenyewe Wanayanga wanasema msimu huu wanataka burudani na magoli. Walifurahia burudani kwenye mchezo wa kilele cha wiki ya Mwananchi dhidi ya Aigle Noir wiki iliyopita na sasa wanataka Burudani kwenye ligi
Kesho pale kwa Mkapa, Wananchi wanatarajiwa kufurika kushuhudia burudani waliyoandaliwa na vijana wao katika mchezo wa kwanza msimu huu
