1. Tuisila Kisinda
Kisinda amesajiliwa na Yanga akitokea klabu ya AS Vita, amefanya mazoezi kwa takribani siku tano tu na kikosi cha Yanga
Hii ni mashine kwelikweli, ana kasi na akili, anakimbiza na akipata nafasi anajaribu. Kwa huyu wapinzani watakuwa na wakati mgumu kumdhibiti
2. Mukoko Tonombe
Huyu ni kiungo mkabaji halisi. Yuko eneo lake la kazi muda wote. Anazuia, anachezesha timu na pale anapopata nafasi ya kushambulia hapotezi muda
Huu ni usajili mwingine ambao Wanayanga wataufurahia msimu huu
3. Farid Mussa
Dakika zake alizocheza kwenye kipindi cha pili zimeonyesha Farid ni mchezaji atakayekuwa na faida sana kwa Yanga
Ana kasi, nguvu na akili. Farid sio muoga, ni aina ya wachezaji ambao walinzi wengi hawatamani kukutana nao
Sijui itakuwaje pale watakapoanza pamoja na Kisinda. Kasi yao itakuwa shida kwa timu pinzani
4. Zawadi Mauya
Katika eneo ambao kocha wa Yanga atapta shida kupanga ni eneo la kiungo
Mauya aliingia kipindi cha pili kuchukua nafasi ya Mukoko. Kazi aliyokuwa akiifanya Mukoko naye aliifanya kwa ustadi
Mauya hakuja Yanga kwa bahati mbaya, ni mchezaji mwenye uwezo mkubwa na hilo ameanza kulithibitisha mapema
5. Kibwana Shomari
Anazuia timu inaposhambuliwa na pia ni mwepesi kupanda kuongeza mashambulizi. Krosi zake zinanikumbusha enzi za Juma Abdul
Ana kasi na mara nyingi yuko eneo analopaswa kuwepo
6. Yassin Mustafa
Katika mchezo dhidi ya Aigle Noir, upande anaocheza ulitumika sana kwenye kupanga mashambulizi
Yassin alikuwa na uelewano mzuri sana na Tuisila Kisinda. Kazi yake imeonekana uwanjani leo, hakuna shaka ubora wake utaendelea kuonekana kadiri atakavyokuwa akipewa nafasi
7. Michael Sarpong
Amefunga bao na kufanya majaribio kadhaa katika mchezo wake wa kwanza. Hiyo ndio sifa ya mshambuliaji. Tangu atue Yanga amefanya mazoezi chini ya siku tano
Hakuna shaka, Sarpong atafunga mabao mengi katika kikosi cha Yanga
8. Waziri Junior
Ni mchezaji aliyeonyesha kuwa na vitu vingi mguuni. Leo alikuwa na papara kwa kuwa alikuwa na shauku kubwa ya kufunga. Lakini ameonyesha ni mshambuliaji msumbufu, Wanayanga watarajie mambo mazuri kutoka kwake
9. Carlinhos
Alicheza kwa takribani dakika nane tu, lakini alifanya jaribio moja ambalo nusura lizae bao. Kiungo huyo ni kawaida yake kupiga mashuti ya mbali
Amechelewa kujiunga na Yanga, amefanya mazoezi kwa siku tatu tu, lakini huyu mpira anaujua
10. Bakari Mwamnyeto
Ni yuleyule ambaye mashabiki walikuwa walimtarajia. Leo amecheza vizuri sana akishirikiana na Abdallah Shaibu Ninja
Bado ni mapema lakini ni wazi ni mchezaji ambaye atakuwa nguzo muhimu kwenye safu ya ulinzi Yanga
11. Abdallah Shaibu 'Ninja'
Amerejea kutoka kule Marekani alikoitumikia LA Galaxy kwa takribani miezi sita
Ni mchezaji anayeonyesha kupevuka zaidi, sasa akicheza kama mchezaji kiongozi
Kwa hakika safu ya ulinzi ya Yanga msimu huu ina watu..!
