Mkurugenzi wa uwekezaji GSM Mhandisi Hersi Said amesema kama klabu ya Simba itatangaza kumsajili mshambuliaji Bernard Morrison leo, basi watadhihirisha kuwa ni wao waliokuwa wakimpa kiburi na kumfanya awe mtovu wa nidhamu ndani ya Yanga
Tetesi za klabu ya Simba kuwa mbioni kutangaza kumsajili Mghana huyo zimesambaa kwenye mitandao ya kijamii na kuwaacha mashabiki wa Yanga wakishikwa na mshangao
Akihojiwa na redio moja maarufu kuhusu tetesi hizo, Injinia Hersi alisema anachofahamu suala la Morrison bado halijapatiwa ufumbuzi na Kamati ya Sheria na Hadhi za Wachezaji hivyo kama Simba itatangaza kuwa imemsajili kabla ya mamauzi ya Kamati ni wazi watadhihirisha kuwa ni wao waliokuwa wakimfanya mchezaji huyo awe na kiburi
"Kitakuwa kitu cha ajabu sana, ikiwa watamtangaza leo basi wataudhihirishia umma kuwa wao ndio waliokuwa wanahusika kumpa kiburi kwa yale aliyekuwa anayafanya nje na ndani ya uwanja"
"Kwani ifahamike bado kuna kesi kwenye kamati ya sheria na hadhi za wachezaji ya Shirikisho la Mpira wa Miguu nchini (TFF)," alisema
Kamati hiyo inatarajiwa kuweka hadharani hukumu ya sakata hilo Jumatatu, August 10 2020
Morrison alisajiliwa na Yanga mwezi Januari kwa mkataba wa miezi sita
Hata hivyo kulingana na taarifa iliyotolewa mapema na Yanga, baada ya kuridhishwa na uwezo wake, Mghana huo alipewa mkataba wa miaka miwili ambao aliusaini March 20 2020
GSM kupitia Injinia Hersi ndio waliofanya mzungumzo nae na makubaliano kufikiwa kabla ya nyota huyo kusaini mbele ya Mwanasheria wa Yanga Simon Patrick ambaye kwa sasa ni Kaimu Katibu Mkuu
Hata hivyo Morrison amekana kusaini mkataba huo akidai kuwa saini yake imeghushiwa. Madai hayo yalipelekwa kwa Jeshi la Polisi kwa ajili ya uchunguzi zaidi
Kuweka msisitizo kuwa Morrison ni mchezaji wao halali, Yanga imemjumuisha kwenye kikosi chake kuelekea msimu ujao wa ligi kuu ya Vodacom ambao utaanza Septemba 06 2020
