Baada ya msimu wa ligi kuu kumalizika huku Yanga ikiibuka katika nafasi ya pili, sio vibaya kuwaangazia wachezaji waliofanya vizuri zaidi kwa msimu mzima na kuwapa changamoto wengine kuhakikisha wanakuwa bora zaidi msimu ujao
1. Metacha Mnata
Pamoja na kusajiliwa kwa lengo la kuwa mlinda lango namba mbili mbele ya Mkenya Farouk Shikhalo, Metacha alipindua meza kibabe na kuwa chaguo la kwanza langoni
Alianza kuonyesha makali yake kwenye michuano ya ligi ya mabingwa kule Botswana ambako aliisaidia Yanga kutinga raundi ya kwanza ya michuano hiyo
Metacha anastahili kupewa tuzo ya mlinda lango bora wa msimu kwa kikosi cha Yanga
2. Juma Abdul
Nahodha huyu msaidizi wa Yanga ndiye aliyekuwa mpishi mkuu wa mabao ya Yanga, akitoa pasi saba za mabao
Baada ya Mwinyi Zahera kuondolewa, aliyekuwa kocha wa muda Charles Mkwasa alimrejesha kwenye kikosi cha kwanza na baadae Luc Eymael kumfanya kuwa mchezaji muhimu wa kikosi chake
Kuimarika kwa kiwango chake, kulimpa nafasi ya kuitwa timu ya Taifa ambayo ilikwenda kushiriki michuano ya Chalenji kule Uganda
3. Jaffar Mohammed
Pamoja na kuwa hakuwa na nafasi ya kudumu kwenye kikosi cha kwanza, Jaffar alifanya vizuri katika mechi nyingi alizotumika kama mlinzi wa kushoto
Mkwasa ndiye aliyembadilishia majukumu kutoka nafasi ya kiungo wa ushambuliaji na kumrudisha beki wa kushoto kutokana na mapungufu yaliyopo
Yeye pamoja na Adeyum Saleh walikuwa wakipokezana nafasi hiyo, lakini Jaffar alikuwa bora zaidi hasa timu inapokuwa inashambulia
4. Said Juma Makapu
Pamoja na Mwinyi Zahera kusajili walinzi wengi wa kati, ukimtoa Lamine Moro, hakuna mwingine aliyeweza kufanya vizuri zaidi ya Makapu
Makapu ameonyesha ujasiri mkubwa wakati wa Eymael, alimfanya kocha huyo amuamini na kwa kiasi kikubwa aliweza kufanya vizuri katika mechi alizocheza
Hakuna aliyetarajia kama Makapu atakuwa mlinzi wa kutegemewa wa kikosi cha Yanga, wengi waliamini kuwa mlinzi huyo mrefu alibaki kwa bahati mbaya kwenye kikosi cha msimu huu
Lakini kazi aliyoifanya bila shaka imewaziba midomo wote waliokuwa wakimkosoa
5. Lamine Moro
Moro alikuwa nguzo muhimu kwenye safu ya ulinzi wa Yanga. Anaweza kuwa mchezaji aliyecheza dakika nyingi zaidi katika kikosi cha Yanga
Moro hakuachwa nje wakati wowote ambao alikuwa fit au hana kadi. Ameitumikia Yanga kwa nguvu zote na hakika ni aina ya wachezaji ambao Yanga itajivunia kuwa nao kwenye kikosi
6. Feisal Salum
Alianza msimu kwa kusuasua. Mwanzoni alikosolewa sana kuwa kiwango chake kimeshuka. Hata alipokuja kocha Luc Eymael hakumpa nafasi kwenye mechi zake za mwanzo
Lakini baadae Fei Toto akawa mchezaji tegemeo katika kikosi cha Yanga. Uwezo wake wa kucheza nafasi zote za kiungo, umewapa sababu makocha kumtumia vile walivyopenda kutegemeana na mfumo
7. Deus Kaseke
Kaseke ni mchezaji mwingine aliyezaliwa upya mwaka huu. Tangu ligi iliporejea baada ya mapumziko ya corona, Kaseke alikuwa chachu ya mafanikio ya Yanga. Alifunga, alitengeneza nafasi lakini pia uwezo wake wa kucheza nafasi zaidi ya moja uwanjani, uliwapa makocha uhuru wa kumtumia popote penye mapungufu
Ndio maana kuna wakati alitumika kama mlinzi wa kulia, ndani ya mechi pia alibadilishiwa majukumu kadiri alivyohitajika
8. Haruna Niyonzima
Niyonzima alipotua Yanga mwezi Januari aliongeza ubunifu kwenye safu ya kiungo. Pamoja na mapungufu yaliyokuwepo awali, timu haikuwa na kiongozi zaidi ya Papy Tshishimbi kwenye sehemu ya kiungo. Ujio wake uliisaidia hata Yanga kubadili aina ya uchezaji akifiti moja kwa moja kwenye mfumo wa Eymael
9. David Molinga
Pamoja na ukosoaji mwingi kutoka kwa mashabiki, Molinga anabaki kuwa mshambuliaji bora wa Yanga msimu huu uliomalizika
Mabao yake 11 aliyofunga kwenye ligi yameisaidia Yanga kuweza kumaliza katika nafasi ya pili
Molinga alikuwa bora miongoni mwa washambuliaji waliopo
10. Mapinduzi Balama
Balama ni mmoja wa wachezaji waliofanya vizuri sana kwenye kikosi cha Yanga msimu huu. Alikuwa mtu muhimu sana kwenye safu ya kiungo na hata alipoumia, pengo lake lilionekana dhahiri. Balama anastahili kuingia kwenye kikosi bora cha Yanga msimu huu
11. Patrick Sibomana
Wakati wa Zahera, Sibomana ndiye aliyekuwa mchezaji tegemeo kwenye kikosi cha Yanga. Alikuwa na mchango mkubwa wakati timu ikishiriki michuano ya ligi ya mabingwa
Ni mmoja wa wachezaji ambao waliathirika na mabadiliko ya benchi la ufundi. Baada ya ujio wa Eymael hakuwa akipata nafasi mara kwa mara kwenye kikosi cha kwanza
Na haikushangaza kuonekana ameshuka kiwango, na kuwa miongoni mwa wachezaji ambao wana nafasi ndogo ya kuendelea kubaki katika kikosi cha mabingwa hao wa kihistoria
Anashika nafasi ya pili katika kupachika mabao msimu huu nyuma ya David Molinga akifunga mabao sita kwenye ligi
NYOTA WENGINE
Papy Tshishimbi
Nahodha Papy Tshishimbi amefanya vizuri kwa nyakati toafuti. Kuna wakati alikuwa nguzo muhimu katika kikosi na kuwa wakati alionekana kushuka kiwango
Hata hivyo majeraha aliyopata baada ya mapumziko ya corona, yamemfanya ashindwe kurejea kikosini licha ya kupata nafasi kwenye mchezo wa FA dhidi ya Simba
Kelvin Yondani
Mkongwe huyu nae alikuwa na mchango mkubwa msimu huu. Kwa mara ya kwanza mashabiki wamemshuhudia nohodha huyo wa zamani akitumika kama mchezaji wa kiungo katika baadhi ya mechi. Pamoja na umri wake kumtupa mkono, uzoefu wake uliisaidia Yanga kufanya vizuri katika nyakati ngumu
Abdulaziz Makame
Ni mchezaji aliyeingia na kutoka kwenye kikosi cha kwanza kwa nyakati tofauti. Hakuna shaka na kipaji chake lakini hakupata nafasi ya kudumu kwenye kikosi cha kwanza kutokana na ushishani uliokuwepo katika nafasi anayocheza
Mohammed Issa 'Banka'
Banka alianza msimu vizuri akiwa mmoja wa wachezaji tegemeo kwenye kikosi cha kwanza. Hata hivyo majeraha ya mara kwa mara ni kama yaliharibu mwendelezo wake kutoka mechi moja kwenda nyingine. Inaelezwa, Banka yuko mbioni kujiunga na Azam Fc
Farouk Shikhalo
Shikhalo ameonyesha kuwa mlinda lango mzuri lakini makosa aliyokuwa akifanya kwenye baadhi ya michezo yalimfanya akose kuaminiwa na benchi la ufundi
Alirejea vizuri kwenye mechi za mwisho kumaliza msimu kabla ya kupata majeraha ambayo aylimfanya akose baadhi ya michezo
Ditram Nchimbi
Pamoja na kuwa kasi yake ya kupachika mabao haikuwa nzuri, Nchimbi aliongeza kitu kwenye safu ya ushambuliaji
Wakati mwingine Eymael alimtumia kama winga na alifanya vizuri
Mrisho Ngasa
Ngasa hakuwa akivuma, lakini ni miongoni mwa wachezaji waliofanya vizuri msimu huu. Hakuwa na nafasi ya kudumu kwenye kikosi cha kwanza lakini mchango wake ulionekana katika mechi alizoaminiwa
Tariq Seif
Mashabiki walikuwa na matumaini makubwa kwake na alinza vizuri majukumu yake Yanga. Amemaliza msimu akiwa na mabao matatu. Hakuwa akiaminiwa sana na benchi la ufundi, pengine kama angepewa nafasi, angefanya vizuri zaidi
Erick Kabamba
Huyu alitua usajili wa dirisha dogo. Wachezaji wenzake walikuwa wakimkubali sana lakini nae hakubahatika kuaminiwa sana na benchi la ufundi ingawa kila alipopewa nafasi alionyesha kuwa na kitu mguuni. Kama atabakishwa kwenye kikosi pengine anaweza kuwa bora zaidi msimu ujao
WALIOBORONGA!
Yikpe Gnamien
Moja ya wachezaji ambao mashabiki hawakumkubali kabisa. Hakuonyesha uwezo, huyu utakuwa muujiza kama ataendelea kubaki kwenye kikosi cha Yanga
Bernard Morrison
Aliingia kwa makeke na hakika alikuwa tumaini jipya ndani ya Yanga. Lakini kuwa mchezaji mzuri bila ya nidhamu ni kazi bure.
Leo hii hakuna shabiki mwenye muda wa kumjadili licha ya kuwa ni mchezaji ambaye mwanzoni alikuwa kwenye midomo ya kila shabiki
Huyu kajiharibia mwenyewe kutokana na nidhamu yake mbovu
