Mambo yanaendelea kupamba moto viunga vya Jangwani! Baada ya uongozi wa Yanga kutangaza kumtimua aliyekuwa kocha wake Luc Eymael kutokana na kauli zake za kibaguzi, CV za makocha kibao zimeendelea kumiminika wakiomba kumrithi Mbelgiji huyo
Ikumbukwe pia, hata kabla ya Eymael kutimuliwa, Yanga ilikuwa na mchakato wa kusaka kocha msaidizi ambapo inaelezwa kocha huyo ameshapatikana na pengine anaweza kutangazwa wiki hii
Hitimana Thiery, Mkufunzi wa Namungo Fc anatajwa kuwa ndiye atakayekuwa kocha msaidizi wa Yanga
Klabu ya Namungo iko kwenye hatua za mwisho kumalizana na kocha kutoka DR Congo ambaye anatajwa kuja kuchukua nafasi ya Hitimana
Mnyarwanda huyo aligoma kuongeza mkataba mpya na vijana hao kutoka Ruangwa kule mkoani Lindi
Pamoja na kuwa mwenyewe (Hitimana) amekataa kata kata kuthibitisha kuwa anaelekea Yanga, lakini ni wazi jambo hilo huenda linasubiri muda mwafaka likamilishwe
Aidha katika orodha ya makocha walioomba kuinoa Yanga, inaelezwa kuwa yapo majina ya makocha kama Patrick Aussems, Hans Van Pluijm na George Lwandamina kutoka Zambia
Pluijm na Lwandamina ni makocha waliowahi kufanya kazi pamoja kwa kipindi kifupi Yanga kabla ya Pluijm kutimkia Singida United
Lwandamina alichukua nafasi ya Pluijm, wakati Mholanzi huyo akipewa cheo cha Ukurugenzi wa Ufundi, cheo ambacho hakudumu nacho na hata alipoondoka Yanga wakakifuta
CV za makocha hao zinajieleza, wote waliisaidia Yanga kutwaa ubingwa wa ligi kuu na kushiriki hatua ya makundi ya michuano ya kombe la Shirikisho
Pluijm yeye aliipa Yanga mataji matatu ya ligi kuu huku mafanikio makubwa zaidi akiyapata msimu wa 2015/16 kwa kushinda mataji yote ya ndani
Aussems itakuwa mara yake ya kwanza kuitumikia Yanga kama ikitokea mabingwa hao wa kihistoria watamteua yeye
Lakini alijijengea heshima kubwa wakati akiinoa klabu ya Simba kwa kuisaidia timu hiyo kucheza robo fainali ya michuano ya ligi ya mabingwa barani Afrika mwaka juzi
Tangu aondoke hapa nchini, inaelezwa Aussems hakuna na timu hivyo ni kazi ambayo kama ataipata, ataifanya kwa moyo wake wote
Mashabiki wa Yanga wanasubiri kufahamu viongozi wao watamleta kocha yupi ambaye ataweza kutimiza malengo ya kushinda ubingwa wa ligi kuu msimu ujao
Mchakato huo utakamilishwa kabla ya August 14, tarehe ambayo Yanga huenda itaanza maandalizi kwa ajili ya msimu wa 2020/21
