Uongozi wa klabu ya Yanga umesema kuwa umefunga mjadala kuhusu mchezaji raia wa Ghana Bernard Morrison anayedai kuwa huru kuanzia juzi Julai 15 baada ya kumaliza mkataba wake wa miezi sita ambao anadai kuutambua
Afisa Habari wa Yanga Hassan Bumbuli amesema hawana muda wa kujibizana na mchezaji huyo wakimtaka achukue uamuzi wake ambao anaona unafaa
"Sisi hatutaki maneno maneno mengi, kama anasema hana mkataba Yanga basi na aende akasaini mkataba na timu nyingine, yeye si ni mchezaji mkubwa? Waandishi wa habari muende mkamshauri badala ya kila siku kuzungumza tu kuwa hana mkataba mwambieni aende akasaini mkataba mpya huko anakohitajika"
"Lakini pia madai ya kuwa hajalipwa mshahara kwa miezi miwili mwambieni atoe taarifa ya benki ili nanyi mjiridhishe kama ni kweli hajalipwa?," alisema Bumbuli
Hivi karibuni uongozi wa Yanga uliwataka wanachama na mashabiki wake kutulia kwani wanafahamu ni hatua gani watamchukulia mchezaji huyo kutokana na matukio yake ya utovu wa nidhamu
Inaelezwa Yanga haina mpango wa kuvunja mkataba wake, licha ya jitihada za waziwazi zinazofanywa na Morrison kushinikiza jambo hilo ili aondoke akiwa mchezaji huru
Mkurugenzi wa uwekezaji GSM Mhandisi Hersi Said juzi aliweka wazi kuwa Yanga iko tayari kumuuza Morrison kama itajitokeza timu kumuhitaji lakini sio vinginevyo
