Wachezaji hawakuwa sawa kisaikolojia - Eymael

Licha ya kuibuka na ushindi wa mabao 3-1 dhidi ya Singida United, Kocha Mkuu wa Yanga Luc Eymael amesema vijana wake hawakuwa sawa 'kisaikolojia'

Mbelgiji huyo amesema wachezaji waliumizwa na kipigo cha mabao 4-1 kutoka kwa Simba, hivyo walicheza mchezo huo kama wamelazimishwa

"Vijana wangu waliingia uwanjani wakiwa hawapo sawa kisaikolojia kwa maana walipoteza fahari yao, pesa na imani kwa mashabiki wao kutokana na matokeo ya mchezo uliopita wa jumapili dhidi ya Simba"

"Kufungwa ni kufungwa tu, hakuna sababu ya kupoteza matumaini. Haijalishi ukubwa wa kipigo kwa maana hata tungefungwa 5, 3, 2-1 ama tungefungwa kwa mikwaju ya penati bado uhalisia ungekuwa ule ule kuwa tumetolewa"

"Man City alifungwa goli 3-1 dhidi ya Liverpool lakini mwezi huu mwanzoni wakalipa kisasi kwa goli 4 - 0.  Huwezi kushinda mara zote ila inapotokea umepoteza unarudi kujipanga na kuhakikisha unashinda mchezo ujao, tutarudi imara zaidi msimu ujao," alisema Eymael

Akizungumzia mchezo wa jana Eymael alisema kukosekana kwa umakini kwenye safu ya ushambuliaji bado ni changamoto kwani wangeweza kuibuka na ushindi mnono zaidi kama wangetumia nafasi nyingi walizotengeneza

"Tumeshinda dhidi ya Singida United japo tumepoteza nafasi nyingi za kutanua ushindi wetu, tatizo la kutotumia nafasi za kufunga tuzipatazo linajulikana na tutalifanyia kazi kama benchi la ufundi"

Yanga itashuka tena uwanja wa Taifa Jumamosi, Julai 18 kuikabili Mwadui Fc