Wakati Yanga ikijiandaa kuivaa Singida United leo katika mchezo wa ligi kuu ambao utapigwa uwanja wa Taifa, mshambuliaji wa timu hiyo David Molinga amewataka mashabiki wa timu hiyo kusahau matokeo ya mchezo wao dhidi ya Simba na kuendelea kuiunga mkono timu yao
Molinga amesema Wanayanga hawapaswi kuona aibu kushindwa kwani wakati mwingine hulazimika kupita hatua hiyo ili kuweza kufanikiwa
"Usione aibu unaposhindwa, kwa maana hulazimika kushindwa ili ufanikiwe. Kama unaogopa kushindwa ama kukosea basi tambua hutoweza kufanikiwa"
"Ni muhimu kusimama tena na kuendelea kupambana baada ya kuanguka , usikate tamaa. Naipenda timu yangu ya Yanga, nitaiunga mkono na kuipigania," aliandika Molinga kwenye ukurasa wake wa mtandao wa kijamii
Mcongomani huyo jioni ya leo, saa moja anatarajiwa kukiongoza kikosi cha Yanga katika mchezo dhidi ya Singida United, mchezo ambao mabingwa hao wa kihistoria wanahitaji ushindi ili kupoza 'machungu' ya kupoteza mchezo uliopita kwa kufungwa mabao 4-1 na Simba
