Juzi mashabiki wa Yanga walipatwa na huzuni kubwa baada ya kuishuhuda timu yao ikichapwa mabao 4-1 na watani zao Simba katika mchezo wa nusu fainali kombe la FA
Suala la kipigo lilikuwa jambo moja, lakini kiwango kilichoonyeshwa na wachezaji ni jambo jingine lililokatisha tamaa na wengi kuona ulazima wa kufanyika maboresho makubwa katika kikosi cha timu hiyo kuelekea msimu ujao
Habari njema ni kuwa tayari michakato ya maboresho ya Yanga ilishaanza mapema hesabu zikiwa kutwaa ubingwa msimu ujao
Yanga tayari imeshanasa sahihi za wachezaji wawili kulingana na chanzo kisicho na shaka ndani ya uongozi wa mabingwa hao wa kihistoria
Hawa ni winga Tuisila Kisinda kutoka AS Vita na beki wa kushoto Erick Rutanga huku mabingwa hao wa kihistoria wakiwa kwenye hatua za mwisho kumalizana na washambuliaji wengine wawili
Imefahamika mmoja wa washambuliaji hao ni Heritier Makambo, nyota wa zamani wa mabingwa hao wa kihistoria ambaye kwa sasa anaichezea klabu ya Horoya AC ya Guinea
Awali Yanga ilipiga hodi Horoya ikimuhitaji mchezaji huyo kwa mkopo, Horoya 'wakachomoa' lakini wakawa tayari kumuuza moja kwa moja
Makambo bado ana mkataba wa miaka miwili na Horoya AC, anaweza kuigharimu Yanga sio chini ya Tsh Milioni 200 kuweza kumnasa
Jambo la uhakika ni kuwa msimu ujao safu ya ushambuliaji ya Yanga itaundwa na sura mpya za kazi
Aidha matokeo dhidi ya Simba juzi yamewatia hasira mabosi Yanga na wadhamini wao GSM ambao sasa wanapasua anga kukamilisha michakato yote ya usajili iliyokuwa ikisubiri ligi kufika mwishoni
Pamoja na Makambo, Mbukinarbe Yacouba Sogne na Mcongomani Mpiana Monzizi mmoja wao au wote wanaweza kuibukia Jangwani
Kulingana na Mkurugenzi wa Uwekezaji GSM Mhandisi Hersi Said ambaye ni Mjumbe wa Kamati ya Utendaji Yanga, nyota watano wa kigeni wanaweza kusajiliwa huku idadi kama hiyo ikitarajiwa kwa upande wa wazawa
Ndani ya wiki mbili vifaa vipya vitaanza kutambulishwa rasmi pale Jangwani kuelekea tukio kubwa la wiki ya Mwananchi ambalo awamu hii litakuwa tofauti kabisa
Safari hii Yanga haitaweka kambi kule Morogoro kama ilivyokuwa msimu uliopita, kocha Luc Eymael anaweza kwenda kuwaandaa vijana wake Afrika Kusini au Ubelgiji
Inafahamika maandalizi hafifu mwanzoni mwa msimu ni moja ya sababu zilizopelekea Yanga kukosa muunganiko tangu mwanzo wa msimu
