Makamu Mwenyekiti wa Yanga Fredrick Mwakalebela amesema uongozi wa timu hiyo utamchukulia hatua winga Bernard Morrison kufuatia kitendo chake cha kukacha kukaa kwenye benchi baada ya kufanyiwa mabadiliko katika mchezo wa nusu fainali kombe la Shirikisho dhidi ya Simba
Katika mchezo huo ambao Yanga ilikubali kipigo cha mabao 4-1, baada ya kufanyiwa 'sub', Morrison 'alimvimbia' mwamuzi pale alipojaribu kumzuia asiondoke eneo la uwanja na hata kumsukuma na kuelekea katika vyumba vya kubadilishia nguo na kisha kuondoka moja kwa moja kwa usafiri wa Bodaboda
Mwakalebela amesema Morrison ataitwa mbele ya Kamati inayohusika na masuala ya Nidhamu ndani ya klabu ya Yanga na atachukuliwa hatua kulingana na makosa yake
"Hakuna aliyefurahishwa na tukio lililofanywa na mchezaji wetu Bernard Morrison kwenye mchezo dhidi ya watani zetu Simba. Akiwa mchezaji wa Yanga mwenye mkataba halali, tutakaa nae na kumsikiliza kisha ataadhibiwa kulingana na makosa aliyofanya," alisema Mwakalebela
Kumekuwa na presha kubwa kutoka kwa mashabiki wa Yanga ambao wengi wameonyesha kutomuhitaji tena mchezaji huyo katika timu yao
Mwanachama na Mhamasishaji maarufu Jimmy Msindo 'Kindoki', amesema yeye kama shabiki kindakindaki wa Yanga hatakuwa tayari kuingia uwanjani kuishabikia timu yake kila itakapotokea jina la Morrison litakuwa miongoni mwa wachezaji wanaoshuka uwanjani
Kindoki amemtaka Mghana huyo kujitokeza hadharani kuwaomba radhi mashabiki wa Yanga kwa matukio yake ya utovu wa Nidhamu na aahidi hatayarudia tena, wanaweza kumsamehe
Wiki iliyopita, Morrison aliingia katika mvutano na uongozi wa Yanga akikana kuongeza mkataba wa miaka miwili. Hata hivyo madai yake yaligonga mwamba TFF
Alijiunga na Yanga usajili wa dirisha dogo mwezi Januari akisaini mkataba wa miezi sita ambao unamalizika leo Julai 14
Baada ya kuridhishwa na uwezo wake, uongozi wa Yanga kupitia wadhamini wao GSM, walimuongeza mkataba wa miaka miwili akilipwa zaidi ya Tsh Milioni 70
Nyota huyo 'alivurugwa' baada ya kupata ofa kutoka klabu moja huko Arabuni iliyokuwa imemuahidi kumlipa mshahara wa zaidi ya Dola 15,000 kwa mwezi
Lakini pia Yanga ilipeleka malalamiko TFF ikidai kuwa na ushahidi klabu ya Simba 'kumrubuni' mchezaji huyo ili ajiunge nao
Morrison mwenyewe alithibitisha kupewa dola 5,000 na aliyemtaja kuwa Wakala wa klabu ya Simba, fedha hiyo akipewa kama sehemu ya ushawishi ili asaini mkataba wa Simba
