Winga Bernard Morrison leo amewapa furaha mashabiki wa Yanga baada ya kufunga bao pekee lililowahakikishia ushindi mabingwa hao wa kihistoria kwenye mchezo wa ligi kuu ya Vodacom dhidi ya Kagera Sugar ambao ulipigwa uwanja wa Kaitaba
Morrison alikosekana kwenye kikosi cha Yanga kwa wiki kadhaa baada ya kuibua sintofahamu kuhusu mkataba wake, hali iliyopelekea suala lake kuamuliwa na Kamati ya Sheria na Hadhi za Wachezaji Shirikisho la Mpira wa Miguu nchini (TFF)
Morrison amedhihirisha umuhimu wake leo mbele ya Kagera Sugar, pamoja na kufunga bao la ushindi, kwa muda mwingi aliwaweka kwenye presha walinzi wa Kagera Sugar ambao walishindwa kumdhibiti
Hakuna shaka Morrison atakuwa sehemu ya kikosi cha Yanga kitakachoikabili Simba Jumapili ya Julai 12 2020 katika mchezo wa nusu fainali kombe la FA
Pamoja na ushindi wa leo, Yanga inakwenda kuumana na Simba wachezaji wakiwa na ari kubwa pamoja na uwepo wa Morrison ambaye amedhihirisha ni mchezaji anayeweza kufanya jambo wakati wowote anapokuwa uwanjani
Pengine sasa unaweza kuelewa kwa nini wakati nyota huyo alipokuwa na mgogoro na viongozi wake, baadhi ya mashabiki wa Simba walikuwa wakifurahia hali hiyo wakiamini atakosekana Julai 12
Nyota huyo ndiye anayehofiwa zaidi na Simba kwenye kikosi cha Yanga kwani alipeleka kilio Msimbazi katika mchezo wa mwisho ambao timu hizo zilikutana uwanja wa Taifa na Yanga kuondoka na ushindi wa bao 1-0
Mwamba huyu atakuwepo tena uwanja wa Taifa, Julai 12...!
