Kikosi cha Yanga jioni ya leo kitashuka dimba la Kaitaba Bukoba kuumana na Kagera Sugar katika mchezo unaotarajiwa kuwa na upinzani mkali
Msimu huu Kagera Sugar ni miongoni mwa timu zilizoipa Yanga changamoto katika michezo miwili waliyokutana kila timu ikishinda mchezo mmoja
Kagera Sugar ilishinda mchezo wa kwanza wa ligi kwa mabao 3-0 na Yanga ikashinda mchezo wa robo fainali kombe la FA kwa mabao 2-1
Kwa Kagera Sugar, mechi ya leo wanaichukulia kama mechi ya kisasi wakiwa na kumbukumbu ya kutupwa nje kombe la FA
Kwa upande wa Yanga, mchezo wa leo utakuwa maandalizi muhimu kuelekea mchezo wa nusu fainali kombe la FA dhidi ya watani zao Simba
Pamoja na kuwa mabingwa hao wa kihistoria watachukua tahadhari kuepuka kadi na majeruhi, hawatauchukulia 'poa' mchezo huu hasa ikizingatiwa wanahitaji kumaliza katika nafasi ya pili katika msimamo wa ligi
Kiungo Haruna Niyonzima na nahodha Msaidizi Juma Abdul huenda wasiwepo kwenye kikosi kitakachoshuka dimbani leo kutokana na majeruhi
Hata hivyo winga Bernard Morrison yuko 'fit', anatarajiwa kuongoza safu ya ushambuliaji leo, akinoa makali kuelekea mchezo dhidi ya Simba
Takwimu zinaibeba Yanga kuelekea mchezo huo ambao unapigwa katika uwanja wa Kaitaba kwani katika kipindi cha angalau misimu mitatu iliyopita, wameshinda mechi zote walizocheza katika uwanja huo
Baada ya mchezo huo kikosi cha Yanga kitakwea pipa usiku wa leo kurejea jijini Dar es salaam kujiandaa na mchezo dhidi ya Simba
