Mabingwa wa kihistoria Tanzania, Yanga leo watashuka katika uwanja wa Taifa kuikabili Kagera Sugar katika mchezo wa robo fainali michuano ya kombe la Shirikisho (ASFC) ambao utapigwa kuanzia saa moja usiku
Huu ni mchezo muhimu sana kwa Yanga ambayo inasaka nafasi ya kutinga nusu fainali ya michuano hiyo ikijiwekea mpango wa kucheza fainali na hatimaye kutwaa ubingwa ili kukata tiketi ya kushiriki michuano ya Shirikisho CAF msimu ujao
Yanga ilijichimbia kambini baada ya mchezo dhidi ya Ndanda Mbelgiji Luc Eymael akiahidi soka la ushindani dhidi ya wapinzani wake
Ni mchezo wa kisasi kwa Yanga kwani mara ya mwisho timu hizi zilipokutana kwenye ligi, Yanga ilipoteza kwa kufungwa mabao 3-0
Viingilio vya mchezo huo VIP A ni Tsh 15,000/-, VIP B na C ni Tsh 10,000/- na Mzunguuko ni Tsh 5,000/-
Afisa Habari wa Yanga Hassan Bumbuli amewataka mashabiki wa timu hiyo kujitokeza kwa wingi uwanja wa Taifa kuipa nguvu timu yao katika mchezo huo ambao wamepania kushinda
Wapinzani wao Kagera Sugar walitua jijini Dar es salaam juzi usiku
Mkufunzi wa timu hiyo Meckie Mexime, alisema pamoja na kuwa wamebanwa na ratiba, wamejipanga kufanya vizuri kwenye mchezo huo
"Tulifika Dar jana (juzi) saa tatu usiku, tumekuwa tukicheza mechi kila baada ya siku mbili hivyo hilo halitusumbui. Tumepata nafasi ya kufanya mazoezi mepesi, tuko tayari kwa mchezo huo ambao tunafahamu hautakuwa mwepesi"
