Jana wachezaji wa klabu ya Yanga walifanya kikao ambacho kiliwashirikishia viongozi wao wa benchi la ufundi
Kikao hicho kilikuwa maalum kuweka sawa mikakati ili kuhakikisha wanafanya vizuri mechi zilizobaki kufuatia mfululizo wa matokeo yasiyoridhisha
Lakini pia nyota hao walitumia kikao hicho kumjadili winga Bernard Morrison ambaye hivi karibuni aliingia katika mgogoro na uongozi wa Yanga baada ya kuibua sintofahamu kuhusu mkataba wake
Wachezaji wa Yanga walionyesha wasiwasi kutokana na kauli zake alizotoa katika mahojiano na Mwandishi Saleh Ally Jembe na walimtaka kuwahakikishia kama yuko nao
Nahodha Msaidizi wa Yanga Juma Abdul amesema walihitaji kusikia msimamo wake ili wasije wakamuweka katika mikakati yao kumbe yeye hayupo nao
"Tulitaka atueleze wazi kama tuko pamoja au tusimuhesabu kwenye programu zetu. Tunajua ana mgogoro wake na uongozi lakini huu hautuhusu katika kuipigania timu, ilikuwa muhimu tujue msimamo wake ndani ya timu kama tuko pamoja naye isije kuwa sisi tunamipango yetu naye ana mambo yake," Abdul aliiambia tovuti ya Yanga
Morrison amewatoa hofu wachezaji wenzake akiahidi kuipigania timu kuhakikisha inafikia malengo yake
Juzi Morrison aliingia matatani baada ya kudai kuwa hana uhakika kama ataendelea kubaki Yanga baada ya mkataba wake wa miezi sita utakapomalizika Julai 14 huku akisema kuwa hakusaini mkataba mpya na mabingwa hao wa kihistoria
Hata hivyo uongozi wa Yanga kupitia taarifa ya Kaimu Katibu Mkuu, ulijitokeza hadharani na kubainisha kuwa nyota huyo raia wa Ghana alisaini mkataba wa miaka miwili March 20 2020, mkataba ambao utaanza baada ya ule wa awali kumalizika Julai 14
Uongozi wa Yanga uliwahakikishia mashabiki na wanachama wake kuwa mkataba wake ulisajiliwa TFF na FIFA hivyo hakuna shaka kuhusu hatma yake
Aidha kwa kitendo cha kufanya mahojiano na chombo cha habari wakati akiwa kambini, Morrison alipigwa faini ya Tsh Mil 1.5
