Kitendo kilichofanywa na winga Bernard Morrison kutoroka kambini kisha kufanya mahojiano na chombo cha habari ni wazi hakikufanyika kwa bahati mbaya
Morrison amezungumza masuala yanayohusu mkataba wake kwa makusudi pengine kuipa Yanga hasira ili ivunje mkataba uliopo kisha aweze kuondoka akiwa mchezaji huru
Kama Yanga imeweza kuthibitisha nyota huyo kuwa na mkataba wa miaka miwili, kwa nini aseme hana mkataba na Yanga?
Tena anazungumza hayo wakati timu ikiwa kambini kuelekea mchezo muhimu dhidi a Namungo Fc?
Hili ni jambo ambalo linaweza kuwavunja moyo wachezaji wanaojituma kuipambania timu kama watamuona nyota huyo akianzishwa kwenye kikosi cha kwanza
Yanga wamepita wachezaji wengi mahiri, na wengine kibao watakuja lakini hakuna mchezaji atakuwa mkubwa kuliko Yanga
Sasa kama mchezaji alisaini mkataba kwa hiari yake mwenyewe, kama anataka kuondoka si afuate utaratibu ulioainishwa na FIFA kwa timu zinazomtaka kuwasilisha ofa rasmi?
Uongozi wa klabu ya Yanga unapaswa kulivalia njuga sakata lake ili kukomesha baadhi ya timu ambazo zimekuwa na kawaida kuwahaa wachezaji
Msimu uliopita Yanga iliingia kwenye sintofahamu na mlinda lango Beno Kakolanya ambaye alitoroka kambini usiku wakati Yanga ikijiandaa na moja ya michezo ya ligi
Beno aliingia kwenye mtafaruko na aliyekuwa kocha wa Yanga wakati huo Mwinyi Zahera ambaye aligoma kumruhusu kurejea kikosini baada ya tukio lile
Miwisho wa siku Yanga ilivunja mkataba wake na akasajiliwa na Simba akiwa mchezaji huru licha ya kuwa mkataba wake ulikuwa mbioni kumalizika
Pengine na hili la Morrison linaweza kuwa katika mlolongo huo
