Kessy awatahadharisha mashabiki wa Simba

Tangu klabu ya Simba imrejeshe klabuni hapo mshambuliaji Emanuel Okwi kwa mara ya tatu, mashabiki wa timu hiyo wamekuwa wakitoa tambo za kila aina wakidai Yanga ijiandae kwa kipigo kuanzia mchezo wa Ngao ya Jamii utakaopigwa mwanzoni mwa mwezi Agosti.

Sasa mlinzi wa kulia wa Yanga Hassan Ramadhani Kessy amewaambia mashabiki wa timu hiyo watulie kwani siku hiyo watamkataa huyo Okwi.

Licha ya kukiri kuwa Okwi ni mchezaji mzuri lakini amewahakikishia mashabiki wa Simba kuwa hatakuwa na madhara yoyote timu hiyo itakapokutana na Yanga.

“Nimesikia majigambo wanayoyatoa Simba baada ya kumsainisha Okwi, niseme mimi sipendi kuongea, subirieni tutakapoonana uwanjani mimi nikiwa na Yanga na yeye Simba.

“Okwi siyo mchezaji mbaya, ni mzuri, ana uwezo mkubwa, lakini hatakiwi kupewa hizo sifa anazozipata kwa mashabiki wa timu hiyo.

“Kwa kifupi niseme kuwa tutaonana kwenye Ngao ya Jamii kabla ya kuanza ligi kuu halafu utaona kama wataongea tena,” alisema Kessy akiwa Afrika Kusini na timu ya taifa inayoshiriki michuano ya Cosafa.

Kessy ameimarisha kiwango chake na sasa ndiye chaguo la kwanza kwa kocha Lwandamina kwenye nafasi ya ulinzi wa kulia akimpiku rafiki yake Juma Abdul.

Kasi yake na uwezo wake wa kukaba ndivyo vinavyomfanya awe chaguo sahihi kwenye nafasi hiyo kwa sasa.