Kaimu Katibu Mkuu wa Yanga Wakili Msomi Simon Patrick amewatoa hofu wanachama na mashabiki wa timu kuwa winga Bernard Morrison ana mkataba na mabingwa hao wa kihistoria mpaka mwaka 2022
Aidha, Bosi huyo aliyeingia ofisini jana akichukua nafasi ya Dk David Ruhago ambaye mkataba wake ulisitishwa juzi, amesema nyota huyo ataungana na wachezaji wenzake siku ya kesho timu itakaporejea jijini Dar es salaam baada ya mchezo dhidi ya JKT Tanzania ambao unapigwa mkoani Dodoma leo
"Baada ya kuingia ofisini nilitaka kumaliza baadhi ya changangoto zilizopo na niliona nianze na hili la Morrison hivyo nilimuita ofisini, " alisema Patrick
"Nilizungumza nae kuhusu suala la kushindwa kusafiri na timu, nimebaini alipata majeraha siku mbili kabla ya timu kusafiri mkoani Shinyanga."
"Kosa alilofanya ni kushindwa kutoa taarifa sehemu husika, mwenyewe aliomba radhi na sisi kama klabu hatutamchukulia hatua zaidi. Ameahidi jambo hilo halitatokea tena"
"Kuhusu hayo yanayoendelea huko nje, niwahakikishie Wanayanga kuwa Morrison ni mchezaji wa Yanga mpaka mwaka 2022, nazungumza hivi pia nikiwa Mwanasheria wa klabu," alisema Patrick
