Kocha Mkuu wa Yanga, Mbelgiji Luc Eymael, ameeleza kufurahishwa na kiwango kilichoonyeshwa na beki kisiki wa timu hiyo, Kelvin Yondani, katika mchezo wao wa Ligi Kuu Bara dhidi ya Mwadui FC
Yondani, ambaye tangu kutua kwa Eymael amekuwa si chaguo lake katika kikosi cha kwanza, juzi alianzishwa akicheza kama kiungo mkabaji, namba sita dhidi ya Mwadui FC na kuonyesha uwezo mkubwa uliowasaidia kuibuka na ushindi wa bao 1-0.
Akimzungumzia beki huyo, Eymael alisema Yondani ameonyesha ubora wa hali ya juu kwa kucheza vizuri katika nafasi tofauti.
"Kelvin kacheza vizuri katika nafasi ya kiungo, kinachotakiwa kwake kwa sasa ni kubadilika na kuelekeza akili yake mchezoni, kaonyesha anaweza kuwa msaada kwa kucheza nafasi zaidi ya moja uwanjani," alisema Eymael.
Katika mechi hiyo ya kiporo cha Ligi Kuu iliyopigwa juzi katika Uwanja wa Kumkukumbu ya Kambarage mjini Shinyanga, bao hilo pekee la Yanga liliwekwa kimiani na Mapinduzi Balama dakika ya sita akiitendea haki pasi aliyorudishiwa na Deus Kaseke.
Yondani akisaidiana na mabeki wa kati, Lamine Moro na Juma Makapu, waliweza kuidhibiti vema safu ya ushambuliaji ya Mwadui FC ambayo ilionyesha uhai mkubwa dakika 15 za mwanzo za kipindi cha pili.
Yanga itashuka tena dimbani keshokutwa, Jumatano safari hii ikiwa ni katika Uwanja wa Jamhuri jijini Dodoma kuwakabili JKT Tanzania na licha ya Eymael kuahidi kunaweza kuwa na mabadiliko kidogo katika kikosi chake, kwa sifa alizozitoa kwa Yondani ni wazi anaweza kumwanzisha tena.
