Kikosi cha Yanga jioni ya leo kitashuka kwenye uwanja wa CCM Kambarage mkoani Shinyanga kuikabili Mwadui Fc ukiwa ni mchezo wa kiporo, Ligi Kuu ya Vodacom
Baada ya kutokuwa na shughuli zozote za michezo kwa takribani miezi mitatu kutokana na ugonjwa wa corona, leo mikiki mikiki ya ligi kuu inarejea
Mchezo mwingine unaopigwa leo ni kati ya Coastal Union dhidi ya Namungo Fc
Yanga iliwasili Shinyanga tangu juzi na kuanza maandalizi yake jana ikipata nafasi ya kufanya mazoezi ya mwisho katika uwanja wa Kambarage chini ya kocha wake mkuu Luc Eymael
Ni mchezo ambao Yanga inahitaji kushinda ili kurejesha imani ya mashabiki wake hasa baada ya kipigo cha mabao 3-0 kutoka wa KMC kwenye mchezo wa kirafiki
Pamoja na kuwa Yanga haina matumaini makubwa ya kutwaa ubingwa VPL, mechi za ligi zinaweza kuwa maandalizi mazuri kuelekea mechi za kombe la FA ambalo mabingwa hao wa kihistoria wanapaswa kulitwaa ili kujihakikishia nafasi ya kushiriki mashindano ya Kimataifa msimu ujao
